Яш спортчуну уьстюнлюклери
Артдагъы вакътилерде юртларда ва шагьарларда бизин районлу спорт булан машгъул яшёрюмлени санаву гюн сайын арта бара. Оланы арасында уллу уьстюнлюклеге етишгенлери, алдынлыкълагъа ес болагъанлары барлыгъы булан биз, озокъда, оьктем болабыз. Оланы оьзге яшёрюмлеге уьлгю этип гёрсетебиз, олар йимик спорт булан машгъул болма, заманын бош йибермей, оьрлюклеге талпынма чакъырабыз.
Мен гьали спортда шолай гёрмекли натижалагъа етишген къарабудагъгентли яшёрюм Изамутдин Изамутдиновну гьакъында язма токъташдым. И.Изамутдинов Къарабудагъгентде тувса да, агьлюсюндегилер булан Каспийск шагьарда яшай. Ол 2006-нчы йыл Къарабудагъгентде ишчилени агьлюсюнде тувгъан, Каспийск 2 номерли орта школада охуй.
Гиччиден берли спортгъа, ябушувгъа бек гьасирет улан. Оьзюгер 11 йыл болагъанда 48 кило авурлукъда мекенли кюйде оьзюню спортгъа, ябушувлагъа байлай. Оьтген 5 йылны ичинде И.Изамутдинов тренерлери Шамил Амировну, Шамил Мичиловну ва Шарамазан Чопановну уьйретивлерини натижасында гёрмекли оьрлюклеге ес болмагъа бажаргъан. «Гьаракатгъа-берекет» дегенлей, гечесин-гюнюн бир этип, спорт ябушувлагъа берилген Изамутдин Изамутдиновну гележеги дагъы да уьстюнлю болажагъына биз инанабыз.
Бугюнге И.Изамутдинов грепплингден Дагъыстанны 3 керен чемпиону, ММА ябушувдан Дагъыстанны 3 керен чемпиону, грепплингден Москваны 3 керен чемпиону, грепплингден Бютюнроссия турнирни 3 керен чемпиону, Дагогни шагьарда оьтгерилген Дагъыстанны чемпионатында гюмюш медальгъа ес болгъан, ММА ябушувдан Бютюнроссия турнирни 2 керен чемпиону, Red FС-ни 2 керен чемпиону, Бютюнроссия ва Халкъара турнирлени чемпиону, панкратиондан Москваны чемпиону ва олай да кёп ярышланы чемпиону ва призёру. Гьали Изамутдин Изамутдинов 61-62 кило авурлукъда ябуша.
И.Изамутдинов оьзюню яш чагъына да къарамайлы, спортну устасына кандидат да дюр.
Биз, И.Изамутдинов йимик, уьстюнлю спортчу яшёрюмлерибиз булан оьктем болабыз.
Изамутдин Изамутдиновгъа буса гележекде дагъы да уллу спорт оьрлюклеге етишмекни ёрайбыз.
Шолай гьаракатчы уланны оьсдюрген ва тарбиялагъан, ону ата-анасына баракалла билдиребиз. Машаллагь, уланыгъызны уьстюнлюклеринден сююне яшагъыз, деп айтма сюебиз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
