Рейд гюплер иш гёре
Алдагъы гюнлерде «Къарабудагъгент район» муниципал районну башчысыны орунбасары Сапиюлла Сайитов районну башчысыны хас буйругъу булан къурулгъан гюплени иши гьакъда баянлыкълар берди. С.Сайитовну сёзлерине гёре, районну башчысыны хас буйругъу булан 7 гюп (группа) къурулгъан. Шо иш гюплер ДР-ни Башчысыны указын ва Роспотребнадзорну ДР-деги ёлбашчысыны къарарын яшавгъа чыгъара. Демек, олар сатыв-алыв тюкенлени ва транспортну тергевюн болдура. Олар оьзлени ишине ич ишлер къурумланы къуллукъчуларын да къуршай.
«Район администрацияда къурулгъан гюплер сатыв-алыв юрютеген 170-ден къолай тюкенге тергевюн болдургъан ва шолагъа гёре 66 акт язылгъан. Шо актларда эсгерилеген кюйде, сатыв-алыв юрютеген тюкенлер санитар режимни бузгъан яда буса вакцина этдирмеген. Декабр айны ортасына сатыв-алыв тармакъда ишлейген 153 къуллукъчу вакцина этдирген.
РФ-ни Гьукуматыны къарарына гёре, район администрацияны ГО ва ЧС бёлюгюню ёлбашчысына протоколлар язмагъа ва шоланы судгъа бермеге ихтияр этилген.
Бизин аслу мурадыбыз халкъгъа къодулар (штраф) салмакъ тюгюл, оланы савлугъун ва яшавун сакъламакъ. Айтагъаным, районну гьакимбашы Магьмут Амиралиев де гьар генгешде ва ёлугъувда шо гьакъда айтып тура.
Районну гьюрметли халкъы! Мен оьзюм де прививка этдиргенмен ва, Аллагьгъа шюкюр, шондан гьеч зарал гёрмегенмен. Шо саялы да, сизин барыгъызны да савлугъугъузну сакъламагъа ва оьзюгюзню аямагъа чакъыраман!», — деп эсгерди оьзюню сёзюнде С.Сайитов.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
