Халкъны талаплары

Генгешни ачгъан ва юрютген районну башчысы Магьмут Амиралиев генгешни ортакъчыларына ватандашланы тилев ва талап арзаларына гьар даим тергев бермеге ва оланы закон гёрсетеген болжалланы ичинде яшавгъа чыгъармагъа тарыкълыгъын ачыкълашдырды.

Сонг трибунагъа районну администрациясыны аппаратыны ёлбашчысы Жамалутдин Имакъов гётерилди ва «Къарабудагъгент район» муниципал район администрацияны атына 2021-нчи йылны 11 айыны узагъында районну халкъындан гелген талап кагъызланы гьакъында баянлыкълар берди.

«Районну халкъындан гелеген тилев ва талап кагъызлар ерлердеги социал-экономика ва яшавлукъ-коммунал гьалны билмеге кёмек эди. Шо саялы да, районну администрациясыны атына ватандашлардан шолай кагъызлар геле.

Район администрацияны халкъны тилевлерин ва арзаларын къабул этеген бёлюк шолар булан ишлей, адамланы къабул эте, маълумат-англатыв иш юрюте ва шо кагъызланы анализин оьтгере.

Шоллукъда, оьтген 11 айны узагъында районну администрациясына районну халкъындан 914 тилев ва талап кагъыз гелген. Оьзлени кагъызларында олар аслу гьалда къурулуш, яшавлукъ, коммунал хозяйство, топуракъны къоллав, айлана якъны гёзеллендирив ва безендирив, олай да оьзге тюрлю масъалаланы гётере.

Олай да, ДР-ни Башчысыны ва Гьукуматыны администрациясындан бизин район администрациягъа 75 арза кагъыз гелген. Къарабу­дагъгент районну прокуратурасындан шолай 37 арза бар.

Къарабудагъгент юртдан – 301, Къакъашурадан – 44, Губденден – 25, Паравулдан – 36, Агъачавулдан – 46, Манасгентден 36 арзалар бар.

Адамлар гётереген арза кагъызлагъа гёре, пачалыкъны законлары токъташдыргъан болжалланы ичинде языв кюйде жаваплар къайтарылгъан»,- деп маълуматлар берди район администрацияны аппаратыны ёлбашчысы Жамалутдин Имакъов.

Генгешде арагъа салынгъан аслу маъалагъа гёре сёйлей туруп, районну гьакимбашы Магьмут Амиралиев халкъдан гелеген арзаланы артгъа тебермеге ярамайгъанын, оланы тилевлерин ва талапларын яшавгъа чыгъармагъа гереклигин аян этди. Шо ишни тюзевлю ва тийишли даражада юрютмек учун юртланы башчылары адамланы къабул этмеге ва олар булан юртну ичиндеги аслу масъалалар гьакъда сёйлемеге тарыкълыгъын ачыкълашдырды.

М.Амиралиев эсгерген кюйде, республиканы ЦУР къуруму йимик, районну оьлчевюнде МЦУ къурулгъанын айтды. Демек шо МЦУ социал сетлерде районлуланы тилев ва талап арзаларына тергев берегенин ва шоланы чечмек учун тарыкълы идаралагъа язагъанын англатды.

Генгешни тамамлай туруп, районну башчысыны М.Амиралиев вакцина этдирив ва догазификация масъалаланы гётерди. Айтагъаным, юртланы догазификация этивюн яшавгъа чыгъармакъ учун юртланы башчылары арзаланы ва хас документлени закон гёрсетеген болжалланы ичинде бермеге герек.