Агьамиятлы масъалалар...

Биринчилей регионну юрютювге къарайгъан Центр бу йылны ноябр айыны 23-ден декабр айны 13-не ерли чыгъаргъан масъалалар ва оланы чечиливню ёллары арагъа салынып къаралгъан.

Регионну Управление Цент­рны (ЦУР) ёлбашчысы Магьамматсолтан Абдуралимов билдиреген кюйде, оьрде эсгерилген болжалны ичинде ватандашлардан 3 мингден де къолай якълав кёмек арзалар гелген ва ишлетилген. Шоланы авадан яны Магьачкъала, Каспийск, Дербент ва Хасавюрт шагьарлагъа тие. Аслу гьалда ватандашланы пачалыкъны янындан этилеген социал кёмеклер гечигип этилегени, электрик ярыкъ, сувукъ сув ёкълугъу, тийишли пособиелер заманында тёленмейгени ва оьзге масъалалар талчыкъдыра.

Токъташдырылгъан болжалда Цетрны аналитиклери 20-дан да къолай маълумат къоркъутувну гьисапгъа алгъан ва ишлетген. Эсгерме тарыкъ, гюз-къыш айлар гелгенде ватандашлардан гелеген арзалар энергетика комплексни ишине байлавлу бола. Лап аслу маълумат къоркъутувлар Магьачкъала шагьаргъа тие. Гьисап берив болжалны ичинде Магьачкъала шагьарда 5-ден къолай уллу сув къайтывлар болгъан, деп ташдыргъан Магьамматсолтан Абдуралимов.

Докладчыны билдиривюнден ачыкъ болгъан кюйде 3 айны ичинде республиканы ватандашларындан ерлерде социал масъалаланы яшавгъа чыгъывуна, чечиливюне байлавлу гелеген арзаланы санаву артгъан. ЦУР-гъа гелген арзаланы 82 проценти магьачкъалалылардан, деп къошду ёлбашчы.

Чарада ерлерде коронавирус инфекция аврувну алдын алывда вакцина этеген пунктланы ишине, оьзю вакцинагъа къаршы арзалар да аз гелмей. Масала, Магьачкъала шагьарны, Къаягент районну ватандашларыны арасында вакцина этдиривню низамы, пунктланы иши гьакъда кёп соравлар тувулуна. «Къаягент районну ватандашлары, районда вакцина этдиривню салынгъан кююне, вакцинагъа байлавлу да соравлар тувулуна»,-деп къошду М. Абдуралимов.

Социал кёмеклени тёлев масъалалагъа къайта туруп, регионну башчысы С.Меликов ДР-ни загьмат министринден англатыв берме талап этди. 3 йылдан 7 йыл битгинче яшлагъа берилеген акъчаланы гьакъында министрни орунбасары Ибрагьим Зайналлаев шо муратгъа федерал центры гёрсетген акъча маялар толу кюйде къоллангъанын ачыкъ этди. Ондан къайры да, шо муратгъа республикада 600 миллион манат етишмейгенин аянлашдырды. Республиканы башчысы Сергей Меликов: “Бу масъала йылны боюнда нече керен гётерилген. Яшлары кёп агьлюлеге сиз тёлеген акъча маяланы оьлчевю тарыкъ тюгюл, олагъа гьукуматны янындан гёрсетилеген кёмеклер заманында, толу кюйде етишгени тарыкъ.­ Сиз бу иш булан бек геч болдугъуз, йылны ахырында Центрдан кёмек излейсиз”,-деди.

Чарада республиканы ватандашларын къыш айларда ток, газ булан тайышывсуз кюйде таъмин этив масъалаланы айланасында мукъаятлы кюйде сёз юрюлдю.

Республиканы районларыны ватандашларындан газ, ток, коммунал-яшавлукъ масъалалагъа байлавлу гелген арзаланы чечивде гёрюлеген ишлени гьакъында республиканы къурумларыны жаваплы къуллукъчулары бар кемчиликлени алдын алмакъ учун гёрюлеген чараланы, этилген ишлени гьакъында айтып сёйледилер.

Масала, республиканы яшавлукъ-коммунал объектлерин къыш айларда тайышывсуз кюйде электрик ярыкъ булан таъмин этмек учун ПАО «Россети Северный Кавказ» – «Дагэнерго» филиалыны директору Магьаммат Абдурашидов ­оьзюню сёйлевюнде ишде бар кемчилик­лени алдын алывда ихтияр якълав къурумлар, муниципалитетлени вакиллери, жамият активистлер булан тыгъыс байлавлукъда ишлейгенин малим этдилер.

Чарада арагъа салынып ойлашылгъан, къаралгъан масъалалагъа байлавлу республиканы башчысы оьзюню пикирин айтып сёйледи. Ватандашланы къазап­ландырагъан масъалаланы тюз ва тезликде чечме тийишли къуллукъланы ёлбашчыларына къатты тапшурувлар берди.

Ватандашланы исси сув, электрик ток, газ булан таъмин этив, олай да коронавирусгъа къаршы иш оьтгерив чаралагъа байлавлу оьтгерилген республика генгешде Къарабудагъгент районну башчысы Магьмут Амиралиев де ортакъ­чылыкъ этди.