Инг де Аслу Законубуз

Россия Федерацияны Президенти оьзюню къуллугъуна гиришегенде Россияны Конституциясына къолун салып ант эте.

Россияны Конституциясында токъташдырылгъан ватандашланы ихтиярлары савлай уьлкеде яшавгъа чыкъма герек. Россияны Конституциясыны тарихине гёз къаратсакъ, огъар бир нече керенлер алышынывлар этилинген.

СССР-ни девюрюнде де Конституция уьлкени оьлчевюнде болуп турагъан тарихи алмашынывланы аянлашдырып юрюген, СССР-ни Конституциясы да бир нече керенлер алышынгъан. РСФСР-ни Конституциясы 1925-нчи йылда къабул этилинген. О советлени бютюнроссия 12-нчи съездини къарары булан тасдыкъ этилинген.

1936-нчы йылны Конституциясы буса умуми кюйде токъташдырылгъан. СССР-ни Конституциясы 1977-нчи йылда алышынгъан.

Россияны Конституциясына гёре, бизин пачалыгъыбыз – федератив пачалыкъ. Пачалыкъны башында – Президент. Кёп йылланы узагъында 12-нчи декабр ишлемейген гюн болуп тургъан. 2004-нчю йылны декабр айыны 24-нде Пачалыкъ Дума Загьмат Кодексде алышыныв­лар этген. Шогъар гёре, 2005-нчи йылдан башлап, декабр айны 12-си – ишлемейген гюн тюгюл деп белгиленген.

Гьалиги Конституцияда билим алмагъа, загьмат тёкмеге, олай да, социал якъдан якъланмагъа ихтиярлары бар экени мекенлешдирилген.

Россия Федерацияны гьалиги Конституциясы 1993-нчю йылны декабр айны 12-нде бютюн халкъны арасына салып ойлашылынгъан ва огъар тавуш берген сонг тасдыкъ этилинген.

Шо замангъы РФ-ни президенти 1994-нчю йыл 12-нчи декабр Россия Конституциясыны гюню – байрам гюн деп къарар къабул этген.

Уьлкени Конституциясы булан пачалыкъны жамият, социал-экономика низамы токъташдырылгъан, федерал къурулушну, адамны ихтиярлары мекенли этилинген. Конституция бизин уьлкени законларыны арасында инг де Аслу Закону гьисаплана.