Юртларда парклар ачылды

Районну башчысы Магьмут Амиралиевни гьаракаты ва гьай этивю булан районну ичиндеги бары да юртларда социал биналар къурула ва олагъа тийишли кюйде ремонт этиле. Олай да, адамланы яшавун яхшылашдырмакъ муратда онгайлыкълар болдурула. Шо ишлени кютювде ва юрютювде бизин районубуз республиканы ичинде ал сыдырада юрюй деп айтмагъа ярай.

Шоллукъда, 16-нчы ноябрде районну Гьели юртунда «Комфортная городская среда» деген программагъа гёре майданча ачылды. Шо шатлы чарада районну гьакимбашы Магьмут Амиралиев район администрацияны жаваплы къуллукъчулары, Гьели юртну башчысы Магьамматгьажи Атаев, юртну администрациясыны къуллукъчулары ва олай да ерли школаны муаллимлери ва охувчулары оьзлени ортакъчылыгъын болдурдулар.

Юртлулар учун ял алагъан майданчаны ачылывунда районну башчысы М.Амиралиев оланы шо иш булан къутлады, олагъа савлукъ ва уьстюнлюклер ёрады. Сонг ол оьзюню сёйлевюнде районну администрациясы энниден сонг да орамланы ва ёлланы, паркланы ва скверлени гёзеллендирмеге гёз алгъа тутгъанын ачыкъ этди.

Юртну башчысы М.Атаевни сёзлерине гёре, шо гюн ачылгъан майданчаны умуми майданы 2 гектар. Шону онгармакъ учун бюджетден 3 миллион 700 минг манатны къадарында харж гёрсетилген. Олай да, шо паркны янында 1 минг квадрат метр майданы булангъы яшлар учун футбол майданча да ачылды.

Шо гюн, 16-нчы ноябрде «Комфортная городская среда» хас программагъа гёре Аданакъ юртда да юртлулар учун ял алагъан паркны ачылыву болду.

Шо шатлыкъда да районну гьакимбашы Магьмут Амиралиев, район администрацияны жаваплы къуллукъчулары, олай да Аданакъ юртну башчысыны заманлыкъгъа борчларын кютеген Магьаммат Арсланбеков, ерли школаны муаллимлери ва охувчулары оьзлени ортакъчылыгъын болдурдулар.

Шо шатлыкъда районну башчысы М.Амиралиев республиканы ва районну ёлбашчылары гьар даим халкъны гьайын болдурагъанын ачыкъ этген сонг, Аданакъда гележекде янгы школа ва яшлар баву къурулмагъа гёз алгъа тутулгъанын англатды.

Аданакъ юртну башчысыны заманлыкъгъа борчларын кютеген М.Арсланбеков районну ёлбашчыларына юртланы халкъына этеген иши саялы, гьакъ юрекден баракалласын билдирди.

Аданакъда ачылгъан ял алагъан паркны умуми майданы 1200 квадрат метр бар. Шо парк Уллу Ватан давда жанын къурбан этген аданакълыланы эсделигине салынгъан памятникни айланасында ерлешген. Олай да, паркны ичинде олтурмакъ учун хас скамейкалар салынгъан.

16-нчы ноябрде районубузну ичиндеги Манасгент юртда да Буйнакскийны атындагъы орамда янгы паркны ачылывуна багъышлангъан шатлы чара оьтгерилди.

Шо чарада район администрацияны башчысыны 1-нчи орунбасары Ибрагьим Абдулмежитов, район администрацияны жаваплы къуллукъчулары, районну ЖКХ управлениесини ва къурулуш къурумну вакиллери, олай да юрт администрацияны башчысы, къуллукъчулары ва Манасгент орта школаны муаллимлери ва охувчулары ортакъчылыкъ этдилер.

Шо шатлы чараны барышында район администрацияны баш­чысыны 1-нчи орунбасары И.Абдулмежитов манасгентлилеге савлукъ, насип ёрагъан сонг, район администрацияны ёлбашчылары артдагъы йылланы боюнда районну ичиндеги юртларда жамият территорияланы онгарылывуна ва безендиривюне агьамият берегенин ва шо ишни уьстюнлю кюйде юрютегенин аян этди. Сонг да, шолай тарыкълы ва агьамиятлы иш энниден сонг да районну ичиндеги юртларда узатылажагъын англатды.

Манасгент юртда шо гюн ачылгъан скверни умуми майданы 6000 квадрат метр бар. Шо майданны ичинде яшланы майданчасы да гьар тюрлю алатлар булан къураш­дырылгъан. Олай да, скамейкалар, ярыкълар ва арив тротуар салынгъан. Шо янгы ачылгъан паркгъа бюджетден таба къурулуш къурумгъа 4 миллион 200 минг манат харж гёрсетилген.