Олар бизин эсибизде
Гьар йыл 10-нчу ноябрде бизин элибизде ич ишлер къурумланы къуллукъчусуну гюню белгилене. Шо гюнню ичинде оьрде эсгерилген къурумланы къуллукъчуларыны атына макътавлу ва лайыкълы сёзлер айтылагъаны булан янаша, оьз борчун кюте туруп, халкъны парахатлыгъы учун жанын къурбан этген полицияны ва оьзге ихтияр якълав къурумланы къуллукъчуларыны атлары оьктем кюйде айтыла ва оланы эсибизге алабыз.
Шоллукъда, бу йыл 10-нчу ноябрде Губден юртда Россияны Игити Абдулмалик Магьамматов яшагъан уьйню тамына эсделик мемориал такъта салынды ва шогъар багъышлангъан митинг оьтгерилди. Озокъда, Абдулмалик Магьамматовну гьакъында бизин газетибизни, республиканы даражасындагъы газетлени бетлеринде ва олай да гьалиги социал сетлерде хыйлы макъалалар ва очерклер язылгъан.
Оьтгерилген шо чарада районну башчысы Магьмут Амиралиев ва РФ-ни МВД-сини Къарабудагъгент район бёлюгюню начальниги Герей Гереев, олай да, Россияны Игитини дос-къардашы, авул-хоншусу, юртлулары ва, озокъда, иш ёлдашлары ва герти къурдашлары ортакъчылыкъ этдилер.
Митинг тамамлангъан сонг, Абдулмалик Магьамматов яшагъан уьйню ичине абурлу къонакълар чакъырылды ва олар аш тепсиге олтурдулар. Шо тепсини айланасында оьтгерилген чараны ортакъчылары Абдулмалик Магьамматов булан бирче жанын къурбан этген ону иш ёлдашларын, ич ишлер къурумланы къуллукъчуларын оьктем кюйде эсгердилер, оланы гьакъында хабарладылар.
Къарабудагъгент районну ич ишлер къурумларыны ветеранларыны советини ёлбашчысы Нюрмагьаммат Мурзаев Абдулмалик Магьамматовну ва ону ёлдашларыны гьакъында баянлыкълар берди.
2008-нчи йылны октябр айны 21-нде бандитлер булан юрюлген ябушувну натижасында Абдулмалик Магьамматов оьлтюрюле. Шо гюн, къувунлу гьалгъа гёре, А.Магьамматовгъа кёмекге Мамаси Эндреев, Салавутдин Элдарханов, Юсуп Устаров ва полицияны район бёлюгюню оьзге къуллукъчулары йибериле.
Озокъда, шо къувунлу гьалгъа ва хас чарагъа (операция) о замангъы РОВД-ни начальниги Руслан Гьажиев оьзюню ёлбашчылыгъын болдура. Юрюлген шо ябушувну натижасында Жамал Алиев де экстремистлени къолундан оьлтюрюле.
Н.Мурзаев бизин булагъы сёйлевюнде шо гюн ва болгъан дагъы да шолай къайгъылы ва авур агьвалатланы гьакъында, оьзюгер нечакъы къыйын буса да, лакъыр этди. 2000-нчи йылларда террористлер ва экстремистлер булан юрюлген ябушувларда Къарабудагъгент РОВД-ни 16 къуллукъчусу бизге парахат яшав бермек учун оьзлени жанын къурбан этген.
Шоланы атларын эсгермекни арив гёребиз: Жамал Алиев, Руслан Михратов, Жамал Гьажиев, Имам Жанмурзаев, Магьамматпазил Исаев, Шамил Солтанагьматов, Аселдер Гьажиев, Абдулвагьит Магьамматов, Магьамматзагьир Удзиев, Зайнутдин Ярагьматов, Гьажимурат Алибеков, Магьамматсолтан Алибеков, Абдулвагьап Абакаров, Руслан Магьамматов ва Жамал Сулейманов. Олай да, ол шолай ябушувларда савлугъун тас этген оьзюню ёлдашларын да эсгерди.
Россияны Игити Абдулмалик Магьамматовну уьюне шо гюнгю чарада ортакъчылыкъ этмек муратда Къарабудагъгент районну ич ишлер къурумларыны ветеранларыны советини ёлбашчысы Нюрмагьаммат Мурзаев, Къарабудагъгент РОВД-ни алдынгъы начальниги Руслан Гьажиев ва ону герти къурдашлары Сайитпаша Устарханов, Абдулмуъмин Муттагьиров, Мамаси Эндреев ва Камал Мустапаев гелдилер.
Шо гюн оьтгерилген чараны ортакъчылары Абдулмалик Магьамматовну ва ону йимик жанын къурбан этген полицияны къуллукъчуларыны, оьзлени иш ёлдашларыны гьакъында эсгере туруп, оланы игит ва къоччакъ ишлери ва ярыкъ келпети гьар даим де халкъны эсинде къалажагъын ачыкълашдырдылар.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
