Гюзлюклени чачыву

Генгешни барышында аслу док­лад булан районну юрт хозяйство управлениесини ёлбашчысы Шагьабутдин Мустапаев сёйледи ва 2022-нчи йылны тюшюмю учун гюзлюк чачывланы гьакъында маълуматлар берди.

Ш.Мустапаевни сёзлерине гёре, 2022-нчи йылны тюшюмю учун 10730 гектар майдангъа гюзлюк къылчыкълы ашлыкълар чачмагъа гёз алгъа тутулгъан. Шоллукъда, 9920 гектар ер сюрюлген ва онгарылгъан. Шо ишлени кютювде 40 хас единица ва агрегат гьар гюн 400 гектар майдан ерни онгара.

- «Къурбуки юрт» муниципал къурулувда гёз алгъа тутулгъан 2000 гектарны 1640 гектарына чачыв этил­ген. Сонг да, «Губден юрт совет» муниципал къурулувда гёз алгъа тутулгъан 2200 гектарны 1580 гектарына ашлыкъ чачылгъан. Олай да, Къарабудагъгент юртда да буссагьат 1135 гектаргъа гюзлюклер чачылгъан. Гьели де буса 1800 гектар планны 1710 гектарына гюзлюк­лер чачылып тамамлангъан, — деди Ш.Мустапаев оьзюню сёйлевюнде.

Районну юрт хозяйство управлениесини ёлбашчысыны маълуматларына гёре, 7130 гектар майдангъа гюзлюклер чачылгъан. Шо буса, гёз алгъа тутулгъан планны 66 проценти бола.

Олай да, ол оьзюню сёйлевюнде эсгерген кюйде, чакъ шулай арив къалса, ноябр айны ахырына гюзлюк чачывланы тамамламагъа имканлыкъ болажакъ. Шо ишни уьстюнлю кюйде тамамламакъ учун тарыкъ чакъы урлукъ бар экенлигин ол ачыкъ этди.

Ш.Мустапаевни докладына гёре, районну гьакимбашы Магьмут Амиралиев оьзюню ойларын ва пикруларын айтды. Демек, районну ичиндеги юрт хозяйство тармакъда ишлейгенлер оьзлени борчларын болжалында кютмеге тапшурду. Сонг да, ол топуракъланы бир категориядан башгъа категориягъа гёчюрмеге тарыкълыгъын айтгъан сонг, шо ишни ахырына чыкъмакъ учун республиканы юрт хозяйство министерлигине тарыкълы документлер онгарып йибермеге буюрду.

Оьзюню сёйлевюню ахырында районну башчысы М.Амиралиев юртланы башчыларына ва оьзге жаваплы къуллукъчуларына вакцина этдиривню гьакъында англатыв ишни гючлендирмеге бирдагъы керен тапшурду.