Меню
16+

Сетевое издание "Району яшаву"  «Будни района»

12.11.2021 09:51 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Редакцияда къонакълыкъда

Автор: Нюрсагьадат Изамутдинова

Ноябр айны 8-нде Къарабудагъгент районну «Районну яшаву» деген газети оьзюню 70-йыл­лыкъ юбилейин белгиледи. Демек, «Районну яшаву» газетни биринчи номери 1951-нчи йылны ноябр айыны 8-нде чыкъма башлагъан. 70 йылны узагъында район газет районну халкъын районда ва тышда болгъан янгылыкълар, оьтгерилген ишлер, гьаллар булан таныш этип тургъан ва бугюнде де шо ишин узата.

Биз, район газетни бугюнгю коллективи, газетни 70 йыллыкъ юбилейин белгилеме айланып турагъанда, район газетде 55 йыл ишлеген, бизин иш ёлдашыбыз болгъан, шаир, загьматны ветераны, ДР-ни маданиятыны ат къазангъан къуллукъчусу Узлипат Ибрагьимова къызы Умукусюм Къурбанова булан бирче, гюллери, савгъатлары булан газетибизни юбилейи булан къутлама гелип коллективни гёнгюн гётерди.

Къонакъланы гелмеклиги бизин коллектив учун уллу савгъат болду. Бугюнгю коллективдегилеге барысына да уьлгю, насигьатчы, кёмекчи болуп кёп йыллар бирче ишлеген къалам ёлдашыбыз Узлипат Ибрагьимовадан савлай коллектив сююндю.

У.Ибрагьимова район газетде 55 йыл загьмат тёкген. Шо иш йылланы ичинде ол бармагъан районну къой-къош, сыйыр, тавукъ ферма, бир юртундагъы бир идара да къалмагъандыр деп айтсакъ да янгылыш болмасбыз. Ол юртларда оьтгерилеген тюрлю чараларда ортакъчылыкъ этген, кёп санавдагъы очерклер ва макъалалар, репортажлар язгъан. Нече-нече адамланы иш гюнлерин суратлагъан, юрт хозяйствону, экономиканы гётергенлер булан районну халкъын таныш этген. Ёлугъувну барышында чай тепсини айланасында У.Ибрагьимова тезги йылларда газетни иши нечик юрюлгени, иш уьстде болгъан тюрлю агьвалатланы гьакъында ва иш ёлдашлары булангъы татывлу аралыкълары гьакъда бизге хабарлады.

Оьзюню сёйлевюнде У.Ибра­гьимова бугюнгю кюллективни атына лайыкълы ва макътавлу сёзлер айтды, оланы ишине бек рази экенин эсгерди.

Сёзюн тамамлай туруп, ол оьзю булан бирче кёп йыллар ишлеген коллективине савлукъ, ишинде уьстюнлюклер ёрады.

Ёлугъувну узата туруп сёйлеген газетни баш редактору Асадулла Гьажиев, Абдуллабек Самадов, Шихав Къайирбеков, Нюрсагьадат Изамутдинова, Багьавутдин Самадов ва оьзгелери бугюнлерде оьзлер булан ишлемей буса да, гьар заман оьзлер эсинде сакълайгъан, юреги излейген Узлипат Ибрагьимованы газетни 70 йыллыкъ юбилейи булан къутлай туруп, огъар къатты савлукъ ва парахат яшав ёрады.

Ёлугъув эсделик суратлар чыгъарыв булан тамамланды.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3