Меню
16+

Сетевое издание "Району яшаву"  «Будни района»

12.11.2021 10:22 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Мемориал такъта ачылды

Автор: Багьавутдин Самадов

10-нчу ноябрде Россияда ич ишлер къурумланы къуллукъчусуну гюню белгилене. Шоланы хас касбу байрамында полицияны ва ич ишлер къурумланы къуллукъчуларыны гьакъында масса маълумат къуралларда генг кюйде языла ва макъалалар бериле. Олай да, шо гюнлерде къоччакълыкъ ва игитлик гёрсетип, арабызда ёкъланы атлары да оьктем кюйде айтыла. Шолай игитлени гьакъында оьсюп гелеген наслубузгъа айтмагъа ва билдирмеге бизин борчубуз. Шоллукъда, ноябр айны 10-нда бизин районубузну Губден юртунда Россияны Игити Абдулмалик Закаригаевич Магьамматовну эсделигине такъта ачылды. Шо чара ол яшагъан уьйню алдында болду ва эсделик мемориал такъта шо уьйню тамына салынды.

Эсгерилген чарада Къарабудагъ­гент районну башчысы Магьмут Амиралиев, ону орунбасары Магьамматгьанипа Зугьумов, район Жыйыныны ёлбашчысыны орунбасары Магьамматдагьир Вагьабов, РФ-ни МВД-сини Къарабудагъгент район бёлюгюню ёлбашчысы Герей Гереев, Къарабудагъгент районну прокурору Рашитхан Рашитханов, олай да игитни иш ёлдашлары, дос-къардашы, къурдашлары ва юртлулары оьзлени ортакъчылыгъын болдурдулар.

Мемориал такътаны ачмагъа ихтияр Къарабудагъгент районну гьакимбашы Магьмут Амиралиевге, Къарабудагъгент РОВД-ни ёлбашчысы Герей Гереевге ва игитни агъасы Магьамматэмин Магьамматовгъа берилди.

Мемориал эсделик такътаны ачгъан сонг, районну ич ишлер бёлюгюню ёлбашчысы Г.Гереев Абдулмалик Магьамматовну къоччакълыгъы ва игитлиги гьакъда хабарлады. Олай да, Г.Гереев берген маълуматлагъа гёре, Россияны Игити Абдулмалик Магьамматов 1960-нчы йылны ноябр айны 10-нда, демек, милицияны гюнюнде тувгъан болгъан.

Ону сёзлерине гёре, 2000-нчи йылланы башында ол янгыз оьзюню уьюню ва юртуну тюгюл, савлай Россияны ва ватандашланы террористлерден ва экстремистлерден якълагъан.

Районну башчысы М.Амиралиев оьзюню сёйлевюнде Россияны Игити Абдулмалик Магьамматовну ­ярыкъ келпети ва къоччакълыгъы гьар заман ону халкъыны эсинде къалажагъын ачыкълашдырды.

Олай да, М.Амиралиев эсгерген кюйде, районну администрациясы гьар заман Абдулмалик Магьамматовну агьлюсюн ва дос-къардашын якълагъанын ва энниден сонг да якълажагъын бирдагъы керен ташдырып айтды.

Чараны барышында сёйлеген Къарабудагъгент РОВД-ни ветеранларыны советини ёлбашчысы Нюрмагьаммат Мурзаев игит Абдулмалик Магьамматов булан бирче 2000-нчи йылланы башында террористлер ва экстресмистлер булан юрюлген ябушувларындан бир-эки мюгьлет хабарлады. Ол да ветеранланы атындан Абдулмалик Магьамматовну агьлюсюне ва дос-къардашына савлукъ ва парахатлыкъ ёрады.

Игитни агъасы Магьамматэмин Магьамматов ва Губден музейни заведующийи Гьамзат Гьамзатов ёлдашлар да Россияны Игити Абдулмалик Магьамматовну яшаву ва уьлгюлю къоччакъ ишлери гьакъда хабарлагъан сонг, шу чараны оьтгерген ва эсделик мемориал такътаны ачгъан район администрацияны ва Къарабудагъгент РОВД-ни ёлбашчыларына гьакъ юрекден баракалласын ва разилигин билдирдилер.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

6