Меню
16+

Сетевое издание "Району яшаву"  «Будни района»

12.11.2021 09:41 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Аз сёзлю, кёп ойлу улан эди

Автор: Узлипат Ибрагьимова

Район газет чыкъма башлагъан 70 йылны ичинде бизин газетде нече тюрлю журналист­лер чалышгъан. Оланы гьариси оьзлени оьр пагьмусу, яшавгъа къаравлары, адамгъа янашыву, адам къылыкълары, бажарывлулугъу булан оьзлени малим этген. Оланы хыйлысы яшавдан гёчсе де, бирче ишлейген йыллардагъы бир-биревге этеген абуру, рагьмусу булан олар юреклени тёрюнде къалгъан. Мен оьзюню гьакъында айтмагъа сюеген адам да шолай.

Мени булан бир класда охугъан, къакъашуралы мисгин Абдуллабек Абдуллабеков 1966-нчы йыл район газетге адабият къуллукъчу болуп гелди. Демек, къысмат бизин редакцияда экинчилей де ёлукъдурду. Ол аз сёзю, кёп ою булангъы, мекенли иш этеген, бек ­пагьмулу, рагьмулу улан эди. Аз да къалмай, ол редакторну орунбасарыны ишине гётерилди. Шонда ол 1970-нчи йылгъа ерли бек уьлгюлю кюйде ишледи.

Аз сёзлю, кёп ойлу улан Абдуллабек уьлгюлю кюйде ишледи. Гелгендокъ, ону бёлюкню заведующийини, жаваплы секретарны ишлерине салып да сынады. Ол язагъан чебер маъналы макъалалар, ол накъышлагъан бетлер охувчуну хыйлы къурчун къандырды. Район газет шо заман республикадагъы район газетлени арасында лап да макъталгъан ва бек арив газетлени бириси эди. Она, шо заманларда бизин район газет печат къурумланы Гьюрметлев доскасында оьзюне ер тапды. Айры-айры ёлдашлар Гьюрметлев грамоталар, багьалы савгъатлар булан савгъатланды. Шо заман Абдуллабекге де партияны район комитети оьзлени Гьюрметлев грамотасын тапшурду. Шондан сонг ону партияны райкомуна пропаганда ва агитация бёлюкге заведующий этип ишге салды. Аз да гетмей, ону халкъ тергевюню район комитетини председателини къуллугъуна гётерип, огъар уллу инамлыкъ билдирдилер.

А. Абдуллабеков ишлей туруп, Ростовдагъы оьр партия школасын да битдирип, экинчи дипломну да къолуна алды. Партия Абдуллабекни дагъы да оьр къуллукъларда сынады. Ол КПСС-ни Дагъыстан обкомуну къурумчулукъ бёлюгюню инспектору болуп да бир нече йыл ишледи. 1983-1986-нчы йыллар «Гьели» совхозну директору, 1986-1989-нчу йыллар «Дагъыстан ГТРК-ни къумукъ бёлюгюню» баш редактору этип, огъар дагъы да уллу инамлыкъ билдирди. Шо ишни беш йыл уьлгюлю кютген сонг, ону Дагъыстан радиону къумукъ редакциясыны редактору этип белгиледилер. Шо ишде ол яшавуну ахыр гюнлерине ерли намуслу чалышды.

А. Абдуллабеков бизин районда ишлейген заманларда Къарабудагъгент район ва юрт советлеге депутат болуп да сайланды. Ол КПСС-ни район комитетини бюросуну, халкъ депутатланы район Советини члени этилип де белгиленди.

А.Абдуллабеков оьз ишин кёп ойлашып, жаны тынышардай кютеген журналист эди. Гьар не ишге тюшсе де, жавапчылыкъны гьис этип ишлейген адам эди. Ол Россияны язывчуларыны ва журналистлерини союзларыны члени де дюр эди. Ол янгыз журналист тюгюл, ол пагьмулу шаир де дюр эди, ону бир нече чебер китаплары да чыкъды.

Гёресиз, район газет нечик пагьмулу уланланы арагъа чыгъаргъан, къанатланма, учма гюч берген.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4