Уьлгюлю яшав ва чалышыв
Алдагъы гюн Къарабудагъгент юрт Баш китапханада белгили пачалыкъ ишлерде чалышывчу, дипломат ва публицист, Дагъыстан республиканы къургъанланы бириси деп айтмагъа ярайгъан Жалалутдин Къоркъмасов тувгъанлы 144 йыл болагъанына багъышланып, тарих сагьат оьтгерилди. Ёлугъувда китапхананы актив охувчулары, район ТОКС-ну ёлбашчысы Умусалимат Бутаева ва муаллимлер ортакъчылыгъын болдурду.
Баш китапхананы къуллукъчулары Ж.Къоркъмасовну яшавуна ва чалышывуна багъышлангъан выставка гьазирлеген эди. Жыйылгъанлар инг башлап выставкагъа къарап чыкъды. Ёлугъувну барышында китапхананы къуллукъчулары Россияны ва Дагъыстанны белгили жамият-сиясат ва пачалыкъ чалышывчусу, Дагъыстан республиканы кюрчюсюн салгъанланы бириси Жалалутдин Къоркъмасовну яшаву ва чалышыву гьакъда хабарлады.
– Жалалутдин Къоркъмасов Дагъыстандан биринчилей Сорбон университетни битдирген. Ол биринчилей «Крестьянский центр» ачгъан, Пачалыкъ Думаны Биринчи чакъырывуну депутаты этилип сайлангъан, Россияны тарихинде биринчилей «Стамбульские новости» деген бизин пачалыкъдан тышдагъы газетни орус тилде чыгъаргъан. Демек, ол дагъы да кёп агьамиятлы ишлерде биринчилерден болуп иш юрютген...
Озокъда, Ж.Къоркъмасов этген бары да ишлени санамакъ учун кёп заман тарыкъ. Оланы барысын да эсгермеге бажарылмай…– деп хабарлай китапханачы Азинат Пашаева.
Сёз берилген райондагъы «Наследники» деген ТОКС-ну ёлбашчысы, яшёрюмлени ат къазангъан насигьатчысы Умусалимат Бутаева, Ж.Къоркъмасовну гьакъында мекенли маълуматлар гелтире туруп, бек маъналы лакъыр этди.
–…Оьрде эсгерилгени йимик, Ж.Къоркъмасов Дагъыстан учун кёп агьамиятлы ишлер этген...
1921-нчи йылны октябр айыны 11-нде ДССР-ни Ревкомуну ва ЭКОСО-ну председателини, РСФСР-ни ВЦИК-ни члени Ж.Къоркъмасовну ва секретары Нахибашевни 114 номерли къарары булан Дагъыстанда уллу мелиоратив реформа оьтгермек, янгы уллу канал ишлемек учун уллу субботниклер оьтгерилмеге башлангъан. Шо тарихи къарар булан Дагъыстанда уллу КОР къурулмагъа башланажакъ гюн белгиленген. Шо канал Къызылюртда Солакъ оьзенни ягъындан башлап Магьачкъалагъа етишдирилмеге гёз алгъа тутулгъан болгъан. Шо уллу агьвалат ва агьамиятлы иш халкъны Ж.Къоркъмасовгъа инанагъанлыгъындан, ону артына тюшегенлигинден гьасил болгъан деп айтма ярай...
1921-нчи йылны ноябр айыны 15-нде каналны ачылыву оьтгерилип, огъар сув йиберилген…
1931-нчи йыл ДАССР-ни Совнаркомуну председатели Ж.Къоркъмасовну Москвагъа СССР-ни ЦИК-ни Президиумуна ишге чыгъара. Онда ол Милли Советни секретарыны, СССР-ни ЦИК-ни Алим комитетини членини, СССР-ни Бюджет комиссиясыны президиумуну членини орунбасары болуп ишлеген…
Олай нечесе уллу ишлени этген, дагъы да кёпню этме гёз алгъа тутгъан Ж.Къоркъмасовну яшаву ойлашмагъан ерде ойгъа гелмейген кюйде къыркъылгъан…- деп хабарлай У.Бутаева.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
