Муаллимни атын ер этмей
Муаллим деген сёзню гюнчыгъыш уьлкелерде уллу гьарп булан яза дей. Шо да себепсиз тюгюл. Муаллим – оьсюп гелеген наслугъа терен билимлер беривде, анадаш ватанына бакъгъан сюювюн уятывда, оланы патриот ругьда тарбиялавда биринчи адам. Бизин районну школаларында оьзлени къайратлы загьматы, касбу бажарывлулугъу булан терен билим беривде гёрмекли уьстюнлюклеге етишген, оьзлер загьмат тёгеген коллективлени, яшланы ата-аналарыны арасында абур къазангъан, олар гьюрмет этеген муаллимлерибиз аз тюгюл.
Къарабудагъгент 2 номерли орта школаны педагогика коллективини арасында бажарывлу, сынавлу, гьакъыллы, оьз ишини усталары кёп бар.
Рус тилни ва литература дарсны муаллими Амарова Касиран Найипхановна шолайлардан гьисаплана. Ол яшланы тынглатып да, тынглап да, охувчуланы пикирине тергев берип, гьасил чыгъарып билеген муаллим. Оьз ишини устасы. Касиран Амарова дарсда гечеген темалагъа яшланы иштагьын гётермек, тергевюн бакъдырмакъ учун охутув, билим берив процесде гьар тюрлю къайдаланы генг кюйде къоллай. Ол гьар охувчугъа терен билим бермек учун оланы интереслерин гьисапгъа алып, охув процесге яшны иштагьын гётерме гьаракат эте.
К.Амарова охутагъан, билим береген охувчулар школада оьтгерилеген чараларда актив кюйде ортакъчылыкъ этелер. Ону охувчулары ахтарыв, гьар тюрлю проектлерде оьзлени лап яхшы янындан гёрсетелер. К.Амарова охутагъан, билим береген яшлар орус тилден, адабиятдан оьтгерилеген олимпиадаларда алдынлы ерлени къазаналар. К.Амарова – оьр категориялы муаллим.
«Адам гьакъыллы, билимли, пагьмулу болгъан чакъы, ол оьзгелерде де шолай рагьмуну гьис эте»,- деп язгъан Л.Н.Толстой. Гертиден де, Касиран Найипхановна да шо асил хасиятлар барысы да бар деп ташдырып айтма ярай.
Оьр касбу бажарывлулугъу, гьаракатчы загьматы саялы, К.Амарова бир нече керенлер Гьюрметлев грамоталар булан савгъатлангъан.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
