Меню
16+

Сетевое издание "Району яшаву"  «Будни района»

08.10.2021 10:59 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Гьал бузукълаша

Автор: Багьавутдин Самадов

Алдагъы гюнлерде ДР-ни Башчысыны заманлыкъгъа борчларын кютеген Сергей Меликовну ёлбашчылыгъы булан коронавирус аврувну яйылывун алдын алмакъ учун къурулгъан республиканы хас оператив штабыны генгеши оьтгерилди.

Генгешни башында ачыкъ болгъан кюйде, республиканы ёлбашчысыны маълуматларына гёре, август айны башындан берли коронавирус аврув булан авруйгъанланы санаву аз болгъан. Октябр айны башына 2 мингге ювукъ аврув больницаларда ятгъан ва шоланы 900-ге ювугъу коронавирус аврув булан авруй.

- Болса да, шо аврувдан оьлегенлени санаву гьар гюн 10-гъа етише. Шо саялы да, республикада коронавирус аврув булангъы гьал мекенли кюйде яхшылашгъан деп айтмагъа болмайбыз. Адамланы ял алагъан вакътилери битгенге ва янгы охув йыл башлангъангъа гёре, адамлар бир-бир булан янгыдан ювукъдан къатнамагъа башлагъан. Шо буса аврувну оьрчюкдюрмеге ва авруйгъанланы санавун артдырмагъа имканлыкъ бере. Оператив штаб шо гьалны ёрукълашдырмакъ учун чаралар гёрмеге герек, — деди ол ­оьзюню сейлевюнде.

Олай да, С.Меликов республиканы савлукъ сакълав министерлигине ва бары да медицина къуллукъчулагъа аврув булан ябушагъаны саялы, оьзюню разилигин билдирди. Сонг да, федерал бюджетден таба шо аврувгъа къаршы дарманлар учун харж йиберилегенин ­ачыкълашдырды.

ДР-ни Башчысыны заманлыкъгъа борчларын кютеген С.Меликов эсгерген кюйде, 2022-нчи йылны бюджетинде дарманлар алмакъ учун енгилликлери бар 500 минг адамгъа 2 миллиард 300 миллион манатны къадарында харж гёрсетилмеге гёз алгъа тутулагъан. Демек, республиканы ичинде бар бары да дарман тарыкъ аврувлагъа дарманланы ва уколланы таъмин этмеге имканлыкъ болдурулажакъ.

Коронавирус аврувну «янгы толкъунун» токътатмакъ ва ону алдын алмакъ учун республиканы ёлбашчысы, диспансеризация ва медосмотр профилактика ишлени янгыртмагъа тапшура туруп, тест ва вакцина этмеге тарыкълыгъын да бирдагъы керен ташдырды.

«Бугюнлерде республикада вакцина этив осаллашгъан. Демек, вакцинаны бир тюрлю халкъ этдирмеге борчлу, башгъалар буса шону этдирмесе де ярайгъан йимик янашыв бар. Шо буса тюз тюгюл.

Коронавирус аврув булан яшлар да авруйгъан болгъан. Бу йылны 9 айыны узагъында коронавирус булан авруй деп, 5614 яш ачыкъ ­этилген. Шоланы 571-и – больницалагъа тюшген. 11-и оьлгенлиги гьакъда къыйнала туруп айтаман. Шо саялы да, школаларда ва оьзге билим берив идараларда аврувну алдын алмакъ учун гёрюлеген чараланы узатмагъа ва дагъыдан-дагъы гючлендирмеге герек.

Республиканы ичинде билим берив тармакъны 95 минг къуллукъчусу вакцина этдирген. Муниципал къурулувларда шо ишни яхшы даражада юрютмеге тапшураман»,- деди С.Меликов оьзюню сёйлевюнде.

Олай да, оьтгерилген генгешни барышында оператив штабны генгешлерини къарарларыны яшавгъа чыгъарылыву гьакъда ДР-ни Гьукуматыны ёлбашчысыны орунбасары Мурат Къазиев, Роспотребнадзорну Управлениесини ёлбашчысыны заманлыкъгъа борчларын кютеген Лариса Пантина, ДР-ни савлукъ сакълав министрини заманлыкъгъа борчларын кютеген Жавгьарат Исаева генг кюйде маълуматлар ва англатывлар бердилер.

Олар оьзлени сёйлевлеринде профилактика чаралар ва халкъны диспансеризация этив, билим берив ожакъларда аврувну оьсювюню алдын алыв, коллектив иммунитетни болдурмакъ учун вакцина этив, 65 йылдан оьмюр чагъы уллулагъа уьйде къалмагъа таклиф берив, чаралар оьтгерегенде адамланы жыйылмагъа гери урув, маска ва перчаткаланы гиеген хас режимни узатыв ва оьзге тарыкълы чараланы гьакъында айтдылар.

Оперштабны ахырында ДР-ни Башчысыны заманлыкъгъа борчларын кютеген Сергей Меликов бирдагъы керен дагъыстанлыланы вакцина этдирмеге чакъырды.

Видеоконференция байлавлукъ къайдада оьтгерилген оперштабны генгешинде Къарабудагъгент районну башчысы Магьмут Амиралиев ва Къарабудагъгент район больницаны баш врачы Расул Гьиравов да оьзлени ортакъчылыгъын болдурдулар.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3