Биолог Адавият

Олай да, А. Агьматова 1998-2018-нчи йылларда Къарабудагъгент 5 номерли орта школада биология дарсдан муаллим болуп ишлеген. Шо йылланы вакътисинде ол методика советни уьюрю болгъан, школаны аттестация оьтгереген ва яшланы ата-анасыны комитетлеринде де чалышгъан. Адавият Агьматованы терен билими бар саялы, ону биологоия дарсдан оьтгерилеген район олимпиадаланы комиссиясыны уьюрю этип сайлагъан.

2018-нчи йылда А. Агьматованы школаны директоруну ИКТ якъдан орунбасарыны къуллугъуна салгъан. Шонда ол 2 йылны узагъында уьстюнлю кюйде ишлегенге гёре, 2020-нчы йылда ону директорну охув-тарбия масъалалагъа жаваплы орунбасарыны къуллугъуна гётерген.

Оьзюню касбу ва загьмат ёлунда Адавият Агьматова охувчуланы юрегине ёл тапмагъа ва олагъа терен билим бермеге бажаргъан. Олай да, ол билимин камиллешдирмекни гьайында тура. Охувчулагъа дарс берегенде гьалиги алдынлы илмуланы ва технологияланы къоллай.

Охувчулар А. Агьматованы дарсларына кёп сююп геле ва огъар тынг­лай деп шагьат­лыкъ эте школаны ёлбашчысы. Шогъар да себеп – охувчулар доктор касбуну сайлай ва оьр охув идаралагъа тюшмеге бажара. Ону охувчулары район ва республика олимпиадаларда ортакъчылыкъ эте ва алдынлы ерлени къазана геле.

Адавият Агьматова яш муаллимлеге оьзюню касбу пагьмусун ва бажарывлулугъун бере, олагъа оьзюню насигьатларын айта. Олай да, яш муаллимлени конференциялар, семинарлар ва оьзге чаралар оьтгермеге гьазирлей.

Бугюнлерде А.Агьматованы иш ёлдашлары, билим берген ва береген охувчулары етишип гелген Муаллимни гюню булан къутлай ва огъар яхшылыкълар ёрай.