Аслу масъалалагъа къаралды

«Къарабудагъгент район» муниципал районну депутатларыны Жыйыныны гезикли 8-нчи сессиясын район Жыйыныны ёлбашчысы Адил Салаватов ачды ва юрютдю. Сессияны ортакъчылары булан саламлашгъан сонг, ол гюнлюк низам булан оланы ювукъдан таныш этди ва сессияны ишин юрютмеге башлады.

Инг башлап, трибунагъа район администрацияны къурум-проект управлениени ёлбашчысы Жанболат Къурбанов чакъырылды ва ол оьзюню сёйлевюнде Къарабу­дагъгент районда милли проектлер ва оьзге программалар яшавгъа чыгъарылагъаны гьакъда мекенли маълуматлар берди.

Ж. Къурбанов эсгерген кюйде, 2020-2021-нчи йылларда умуми алгъанда савлай районну бары да юртларында милли проектлеге гёре, 1 миллиард 900 миллион манатны къадарында кёп иш этилген. Шо ишлени арасында янгы яшлар бавлар, больницалар, амбулаториялар къурулгъан ва янгыртылгъан, школалагъа, маданият уьйлеге ва оьзге социал идаралагъа капитал ремонт этилген, орамлар ва ёллар онгарыл­гъан, тегишленген, асфальт ва бетон салынгъан, адамлагъа ял алмакъ учун бавлар ва парклар тизилген ва безенген, яшлар бавларына, школалагъа, больницалагъа, маданият ожакълагъа тарыкъ-герек алатлар ва къураллар алынгъан ва олай да кёп башгъа тюрлю ишлер этилген.

Районну администрациясыны финанс ишлеге къарайгъан управлениесини ёлбашчысы Абубакар Шагьманаев оьзюню сёйлевюнде Къарабудагъгент районну 2021-нчи йылгъа къабул этилген бюджетине ва, олай да, план булан гёз алгъа тутулгъан 2022-2023-нчю йыллагъа къабул этилген бюджетге алмашынывлар ва толумлашдырывлар гьакъда баянлыкълар берди ва район Жыйыныны депутатларына шоланы якъламагъа таклиф этди.

Район администрацияны аппаратыны ёлбашчысы Жамалутдин Имакъов район Жыйыныны депутатларына район администрацияны янгы структурасыны гьакъында англатыв берди ва ону олагъа аян этди.

Районну администрациясыны топуракъ ва мюлк аралыкълагъа жаваплы бёлюгюню ёлбашчысы Солтан Халилов район Жыйыныны депутатларына районну мюлкюню сиягьы (реестри) гьакъда маълуматлар берди.

Сессияда докладчылар сёйлеп битген сонг, районну гьакимбашы Магьмут Амиралиев гётерилген масъалалагъа гёре оьзюню пикруларын айтды ва баянлыкълар берди.

Масала, районну башчысы эсгерген кюйде, артдагъы 2 йылны боюнда районну ичиндеги бары да юртларда милли проектлеге ва республика хас программалагъа гёре хыйлы иш этилген. Шо яхшы ишлени узатмагъа умуту ва имканлыгъы бар экенлигин де ол яшырмады. Демек, шо ишлеге район Жыйыныны депутатларын ва юртланы башчыларын къуршалмагъа ва оьзлени ортакъчылыгъын болдурмагъа чакъырды.

Олай да, сессияны барышында М.Амиралиев район Жыйыныны де­путатларын вакцина этив ишге де къуршалмагъа ва шо гьакъда халкъны арасында англатыв юрютмеге таклиф этди. Демек, халкъны савлугъун сакъламакъ ва аврувдан аманлыкъ болдурмакъ учун бары да халкъ бирлешип иш гёрмеге тарыкълыгъын ол бирдагъы керен ташдырды.

Сессияны ахырында район Жыйыныны депутатлары гётерилген масъалалагъа гёре тийишли къарарлар ва гьукмулар къабул этди. Район Жыйыныны ёлбашчысы Адил Салаватов да, оьзюню гезигинде, районну башчысыны вакцина этив гьакъдагъы чакъырывун якълай туруп, ­оьзюню ёлдашларына вакцина этивге кёмегин болдурмагъа чакъырды.

Олай да, Адил Салаватов районну муаллимлерин ва билим берив тармакъны къуллукъчуларын оьзлени хас касбу байрамы – Муаллимни гюню булан къутлай туруп, олагъа савлукъ, чыдамлыкъ, насип ва уьстюнлюклер ёрады.