Призывниклени ёлгъа салды

Шоллукъда, 21-нчи октябрде район администрацияны жыйынлар оьт­герилеген уллу залында асгерге чакъырылмагъа заманы етишген ва етишмеген яшёрюмлер булан ёлугъув оьтгерилди. Шо чараны район администрацияны маданият ва туризм ишлеге къарайгъан бёлюгю гьазирлеген эди.

Чараны барышында Къарабудагь­гент районну военкому Дайитбек Шагьбанов, районну администрациясыны башчысыны 1-нчи орунбасарлары Ибрагьим Абдулмежитов ва Магьамматгьанипа Зугьумов, олай да, призывниклени ата-аналары оьзлени ортакъчылыгъын болдурдулар.

«Шу байрам 18 йылдан 27 йыл чагъына ерли яш ва жагьил яшланы арасында абурлу. Бизин райондан 2021-нчи йылны язбаш чакъырывунда 50 яшёрюм асгерге чакъырылды ва асгер бёлюклеге йиберилди.

Артдагъы вакътилерде асгер борчун намуслу кютегенли абуру аза бара эди. Тек пачалыгъыбзны ёлбашчылары эргиши Ватаныны якълавчусу ва солдаты болмагъа тарыкълыгъын арив гёрдю ва шо ишни янгыдан мекенли салды деп айтмагъа ярай.

Олай да, шу байрамда асгер борчун кютмекни пайдалы ва яхшы янларын гёрсетмеге герек. Сизин барыгъызны да шу байрам булан къутлай туруп, къатты савлукъ, чыдамлыкъ, насип, Ватанына амин болуп табулмакъны ёрайман», — деди военком Д. Шагьбанов.

Ата-аналаны атындан сёйлеген Гулесбет Атаева яшёрюмлени асгердеги турушу ва гьалы, оланы асгер къуллукъгъа гьазирлиги гьакъда айтгъан сонг, оланы ана-Ватанына намуслу кюйде къуллукъ этмеге чакъырды.

Чараны ахырында район администрацияны башчысыны 1-нчи орунбасары Ибрагьим Абдулмежитов районну гьакимбашы Магьмут Амиралиевни атындан Призывникни гюню булан асгерге чагъы етишген яшёрюмлени къутлады ва олагъа савгъатлар тапшурду.

Китапхананы къуллукъчулары китапланы ва журналланы выставкасын онгаргъан эди.