Меню
16+

Сетевое издание "Району яшаву"  «Будни района»

29.10.2021 08:41 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Онгайлыкълар болдурула

Автор: Багьавутдин Самадов

Бизин районубузну юртларында артдагъы йылланы узагъында янгы яшлар бавлары, школалар, больницалар къурулагъаны булан янаша адамлагъа ял алмакъ учун парклар ва бавлар янгыртыла ва безендириле. Олай да, орамлар ва ёллар ремонт этилине.

Шоллукъда, алдагъы гюнлерде Агъачавул юртну тарихине язылардай агьвалат ва яхшы иш болду деп, ташдырып айтмагъа ярай. Демек, школаны къырыйында адамлар учун ял алмагъа парк, яшлар учун топ ойнамагъа футбол майданча ачылды ва юртну уллу орамыны бирисине янгы асфальт салынмагъа башланды.

Шо шатлы чарада районну башчысы Магьмут Амиралиев, ону ­ 1-нчи орунбасары Ибрагьим Абдулмежитов, район администрацияны бёлюклерини ёлбашчылары, яшавлукъ-коммунал ва капитал къурулуш управлениени жаваплы къуллукъчулары, къурулуш идараны вакиллери, озокъда, Агъачавул юртну гьакимбашы Арсангерей Ильясов, школаны муаллимлери ва охувчулары оьзлени ортакъчылыгъын болдурдулар.

Инг башлап, районну гьакимбашы Магьмут Амиралиев «Комфортная городская среда» деген программагъа гёре безендирилген скверни ачылывунда ортакъчылыкъ этди. Эсгерилген паркны ясандырмакъ ва безендирмек учун 1 миллион 550 минг манатны къадарында харж этилген.

Шо паркда олтурмагъа скамейкалар, яшлар ойнайгъан къураллар, нас-алагъожаны ташламагъа урналар булан бирче ярыкълары да бар. Айтагъаным, агъачавуллулагъа ял алмакъ учун хас ер болду.

Паркны къабургъасында яшлар учун 880 квадрат метр майданы булангъы футбол майданча да бар. Шо майданчаны халчасын республиканы спорт министерлиги берген. Ону онгармагъа ва яймагъа этилген ишлер учун районну администрациясы 253 минг манат харж гёрсетген.

Олай да, шо гюн районну башчысы М. Амиралиев Агъачавулну орамына салынагъан асфальтны сан янына тергевюн болдурду ва ишчилер булан шо ишни гьакъында хабарлады. Демек, орамгъа 500 минг манатны къадарына асфальт салынажакъ. Шо да юртдагъы машин гьайдавчулардан жыйылгъан транспорт налог­ну къадары.

– Гьюрметли агъачавуллулар! Бугюн сизин юртугъузну ва халкъыгъызны яшаву учун онгайлыкъ­лар болдурула. Республиканы ва районну ёлбашчылары шону гьайында турабыз. Янгы парк, футбол майданча, орамгъа асфальт салыв булан энниден сонг дагъы да шолай ишлени этиливю узатылажакъ. Сизге савлукъ, насип, оьрлюк­лер ёрай туруп, охувчуларыгъызгъа да билимни гьайында турмакъны таклиф этемен, — деди районну башчысы М. Амиралиев, къызыл лентаны гесген сонг.

Сонг да, шо гюн Зеленоморск юртда да шолай шатлы агьвалат ва чара оьтгерилди. Юртну маданият уьюню алдында «Комфортная городская среда» деген программагъа гёре, янгы паркны ачылыву болду.

Шо чарада да районну администрациясыны жаваплы къуллукъчулары, къурулуш бирлешивню вакиллери ва Зеленоморск юртну башчысы, школаны муаллимлери ва охувчулары, яшлар бавуну гиччипавлары ортакъчылыкъ этдилер.

Чараны барышында район администрацияны башчысыны 1-нчи орунбасары Ибрагьим Абдулмежитов, къызыл лентаны гесе туруп, булай деди:

– Бугюн сизин юртугъузда уллу байрам деп айтмагъа ярай. Неге тюгюл де, яшларыгъыз ва уллуларыгъыз учун ял алагъан парк ачылды. Паркны ясандырмакъ учун бюджетден 1 миллион 100 минг манат харж этилинди. Ишден сонг яда гёнгю­гюзню ачмагъа сюйгенде, шунда гелмеге ва олтурмагъа боласыз. Булай яхшы ишлер юртугъузда дагъы да болажагъына инанаман. Сизге савлукъ, парахатлыкъ, насип ва яхшылыкълар ёрайман.

Зеленоморск юртну башчысы Гьажи Гьажибагьамаев юртлуланы атындан районну башчысы Магьмут Амиралиевге, къурулуш идараны ёлбашчысына гьакъ юрекден баракалласын билдирди.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3