Меню
16+

Сетевое издание "Району яшаву"  «Будни района»

22.10.2021 10:23 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Оперштабны генгеши

Автор: Багьавутдин Самадов

Октябр айны 18-нде Дагъыстанны Башчысы Сергей Меликовну ёлбашчылыгъы булан республикада коронавирус инфекцияны яйылывуна къаршы иш юрютеген Оперштабны гезикли генгеши оьтгерилген.

Генгешни ачгъан, Сергей Меликов бугюнлерде Россияда коронавирус инфекциядан авруйгъанланы санаву гюн сайын кёп бола барагъанны айтгъан.

Дагъыстандагъы гьалны гьакъында айта туруп, республикабыз пандемияны гезикли толкъунуна гиргенни эсгерген.

Оьзюню сёлевюнде ол авур къайдада авруйгъан адамланы санаву гюн сайын артагъанны, оьлегенлени санаву да кёп экенни айтгъан.

С.Меликовну сёзлерине гёре, бугюнгю гьал савлукъ сакълав идаралагъа, олай да оьзге тармакълар учун къыйынлыкълар болдура. Медицина къуллукъчуланы иши гюн сайын авур бола, тек оланы 90 проценти вакцина этгенге гёре, оланы арасында авур авруйгъанлар аз. Коронавирус аврув янгы башлангъанда бизин кёп яхшы врачларыбыз, медсестраларыбыз авруду, арасында нечелери оьлдю… Артдагъы гюнлердеги гьалгъа гёре, авруйгъанланы санаву бек арта бара, олагъа барысына да таза гьава (кислород) етишмежеги ачыкъ.

Бугюнлерде 670 адамдан да къолайына таза гьава тарыкъ. Шогъар гёре, иш юрютмеге тарыгъы белгили. Кислород гелтиривню гьайын заманында этмеге герек.

Оьзюню сёйлевюнде Дагъыстанны Башчысы вакцина этдиривге айрыча тергев берген.

“Гетген жума федерал Оперштаб «Стопкоронавирус.рф» деген маълумат ресурс ачгъан. Шогъар гёре, савлай Россияда, шону ичинде регионларда да эпидемия гьалны, вакцинацияны, авруйгъанланы санавун билмеге бола. Дагъыстан шо картада къызыл тюс булан белгиленген. Шо бизин регионда вакцина этив бек осал экенин англата. Шону булан бирче больницаларда коронавирус инфекциядан авруйгъанланы санаву гёрмекли ерни тута”, — деген С.Меликов.

«Шолай болгъан сонг вакцина этдиривге биз юрютеген иш тийишли даражада тюгюлю ачыкъ бола. Болдурулагъан шартлагъа да къарамайлы, шо план бизде толмай. Тарыкъ чакъы пунктлар ачылгъан, ерлеге барып вакцина этеген бёлюк­лер къурулгъан, ПЦР-тергевлер учун тарыкълы затланы алмагъа язда 67 миллион манат берилген эди. Ювукъ заманны ичинде халкъгъа вакцина этивде ортакъчылыкъ этеген медицина къуллукъчулагъа стимул гьакъ бермек муратда 204 миллион манат йибережекбиз. Федерал харжлар булан бирче алгъанда, шо ярым миллиард манатгъа ювукъ болажакъ», — деген ол.

Бугюнге Дагъыстанда вакцина этдиргенлени санаву 480 мингге ювукъ.

Ааврувну алдын алывда вакцинаны пайдасы гёрмекли экенге сав дюнья мюкюр болгъаны гьакъда да С.Меликов эсгерген. Белгили болгъан кюйде, бугюнге ерли вакцина этдиргенлени арасындан бирев де бек къыйын аврумагъан.

Эпидемиология гьал гьакъда ге­нгешде республика Роспотребнадзор управлениени ёлбашчысы Николай Павлов сёйлеген.

Ону маълуматларына гёре, регионда бугюнге 54 минг адам коронавирусдан авругъан деп гьисапгъа алынгъан.

Авруйгъанланы кёбюсю 30-59 йыл оьмюр чагъындагъылар. 60 йыл битгенлени арасында да авруйгъанланы санаву артгъан. Авруйгъан яшлар да бар. Авруйгъанлар заманында медицина идаралагъа гелмейгенлигини себебинден аврув айланадагъылагъа бек яйыла. Авругъан адамлар башгьалардан арек (уьйлеринде) турмай, инфекцияны яйып юрюйлер. Оьзюню сёйлевюнде Н.Павлов медицина къуллукъчуланы бек сакъ болмагъа, авруйгъанлагъа тергевлю болмагъа чакъырды.

“Базарларда ишлейгенлени кёбюсю вакцина этдирмеген. Олай да, башгъа сатыв-алыв точкаларда, ресторанларда да кёп адам къатнаша, арасында оьзлер билмейген кюйде авруйгъанлары бола. Олардан таба да аврув яйыла. Олагъа ва башгъаларына вакцина этдиривню гьайын иш ёлбашчылары этмеге герек. Тергевсюз ёлбашчылар такъсырланма тарыкъ”,- дей ол.

Аврувну яйылывуну алдын алмакъ учун маска режим, дезинфекция ва башгъа чаралар низамлашдырылма тарыкъ. Вакцина этдирмеген адамлар такъсырланма герек. Халкъланы арасында вакцина этдиривню пайдасы гьакъда англатыв ишлени артдырма тарыкъ.

ДР-ни савлукъ сакълав министрини борчларын заманлыкъгъа кютеген Татьяна Беляева яшгъа токътагъан къатынгишилеге вакцина этдиривге айрыча тергев берип сёйлеген. Ол айтагъан кюйде, олар аврувну айрокъда къыйын гётере. Т.Беляеваны сёзлерине гёре, 57 медицина идараларда 2623 койка ер гьазирленген. 2200 адамгъа стационар къайдада медицина кёмеклер этиле, вакцина этдирив ишлеге айрыча тергев бериле.

ДР-ни Башчысы Дагъыстанда авруйгъанлагъа тарыкъ чакъы таза гьава (кислород) болсун учун регионда медицина кислород этеген ерлер болдурулмагъа гереги гьакъда айтгъан ва тапшурувлар берген. ДР-ни Минпромторгун шо масъалагъа гёре мекенли иш гёрмеге чакъыргъан.

РИА “Дагестан” – “Районну яшаву”

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3