Имканлыкълардан пайдаланма болажакълар

Гьалиден бир нече йыллар алда бизин районну юзюмчюлери, бавчулары шолай имканлыкълардан магьрюм эди. Продукцияны къабул этеген къурумлар да кёп къыйын тёгюп болдургъан юзюмню, емишлени оьзюне токътайгъан багьасындан учуз алагъан йыллар кёп болду. Муна, 2021-нчи йылда юзюмню къабул этеген къурумлар юзюмню килосун 28-30 манатгъа ала. Уьстевюне, заводлар бу йылдан тутуп, юзюмню столовый жураларын «Августинни», «Молдованы» да ала. Юзюмню заводлар сатып алагъан багьалар продукцияны болдурмакъ учун чыгъагъан харжлагъа къарагъанда кёп де тюгюл, тек бу йыл йимик геч бишеген юзюмлер узакъ янгурлардан сонг пуч болма башлагъанда, багьалар да яман тюгюл деп къойма ярай.

Артдагъы йылда рай­онну башын тутгъан М.Амиралиевни гьаракаты булан районну территориясында емишлер, овошлар, юзюм сакълама болагъан складлар къурма инвесторлар тапма гюч бакъдырылгъан эди. Муна, гьали районну территориясында 3 минг тон юзюм, емишлер сакълама болагъан хранилишелер бар.

Масала, “Къурбуки юрт” муниципал къурулувну топуракъларында октябр айны башында 1,500 тон емиш, юзюм, оьзге продукция сакъланма болагъан “хранилище” пайдаландырывгъа берилди. “Хранилищени” «Союз» деген СПОК къургъан. Олар бу йыл 800 тон юзюмню сакълавгъа салма умут эте. Тек, токътавсуз болгъан янгурлар юзюмню сан янына таъсир этип сакълавгъа юзюм салынмай къалды.

Бу йылгъы тюшюмден районда сакълавгъа янгыз 1,5 минг тон тюгюл салынмагъан. Имканлыкълар буса районда эки керенге артыкъ.

Бар затны заралы тиймес. Районда гележекде шо къадарда емишлер, юзюм сакълама болагъан ерлер бары адамланы юзюм, емиш бавлар салма ругьун уятма бола.