Гьаракат яман гёрюнмей

Тек, бу йылны октябр айында йимик дагьнилер болгъан йыл уллу болгъанланы да эсинде ёкъ. 3-4 гюнню узагъында яхшы кюйде сав суткалар явуп тургъан янгурну дагьниси бет ерлерде де яхшы теренге баргъан. Тюз майданланы дагьнисин айтмай къояйыкъ. Болгъан янгурлар бир нече гюнлер авлакъ ишлени токътатса да, чакъ ачылгъан гюнлени асувлу къолламакъны гьайын этме тюше.

Бу йыл гюзде районну авлакъчылары гелеген йылны тюшюмю учун нечакъы ерге къылчыкълы гюзлюк ­ашлыкълар чачма къаст салынгъан?

Октябр айны 19-нда район администрацияны аппарат жыйынында районда авлакъ ишлени барышы гьакъда районну УСХ-ни ёлбашчысы Шагьабутдин Мустапаев булай маълумат берди:

- 2021-нчи йылны гюзюнде гелеген йылны тюшюмю учун 11 минг гектаргъа ювукъ майданлагъа къылчыкълы гюзлюк ашлыкълар чачма хыял этиле. Шо бу йыл ­чачылгъанындан бир минг гектаргъа артыкъ.

Районда гюз чачывгъа гьазирлик гёре туруп, муниципал къурулувларда топуракъны сюрюв ишлер ­оьзге йыллар булан тенглешдиргенде, къурумлу бара. Гюз чачывгъа гьазирлик гёрювде Гьели, Губден, Къарабудагъгент юрт муниципал къурулувланы авлакъчыларыны, механизаторланы гьаракаты макътавгъа лайыкълы.

“Гьели юрт” муниципал къурулувну жамияты артдагъы 4-5 йылланы ичинде топуракъланы асувлу къоллавда оьзгелеге де уьлгю гёрсетелер. “Губден юрт” муниципал къурулувда да топуракъланы ишлетивге жаваплы янашалар. Артдагъы 2-3 йылны ичинде топуракъланы ишлетив, “Къарабудагъгент юрт” муниципал къурулувда да жанлангъан, мунда гюзлюклер чачылагъан майданлар генглеше юрюйгенин эсгерме тюше.

Буссагьатгъы вакътиде районда гюзлюклер чачмакъ учун сюрюлген 8610 гектар топуракъ бар. Чакъ ачылгъандокъ, сюрюв ишлер узатылажакъ.

Районда октябр айны 19-на, маълуматларда эсгерилеген кюйде, 1800 гектаргъа гюзлюк къылчыкълы аш­лыкълар чачылгъан.

Гелеген йылны тюшюмю учунгъу гьаракатда баягъы “Гьели юрт” муниципал къурулувну механизаторлары яхшы сипте гёрсетип ишлейлер. Олар гюнню бир гесегинде топуракъда ишлеме «терезе» болса, шондан пайдаланма къаст этелер.

Октябр айны 19-нда бизин районну юртларында токътап-токътап ­сыгъанакъ геле эди. Юртну «Узун-аркъа» участкасында уьч «Беларусь» маркалы тракторланы экиси молования этип тура, артына сеялка тиркелген трактор тарлавну барышында токътагъан. Чачывгъа мунда шулай гьазирлик бар.

Юртну башчысы билдиреген кюйде, буссагьатгъы вакътиде юртда 1400 гектаргъа гюзлюк ашлыкълар чачылгъан. Шо вакътиге савлай районда 1800 гектаргъа гюзлюклер чачылгъан. Гьелили механизаторланы гьаракаты айрыча макътавгъа лайыкълы,- деди ол.

Губден, Къарабудагъгент юрт муниципал къурулувларда да чачывгъа гиришгенлер.

Чагъыбыз исси, янгурлар да даим явуп турмас, чакъ ачылар, онгайлы гюнлени уста кюйде къоллап, гюз чачывну къурумлу кюйде тамамламакъ учун белсенме тюшежек. Касбучулар билдиреген кюйде, районда урлукъланы масъаласы да ёкъ.

Мол тюшюмлеге кюрчю салывда булай онгайлы шартлар гьар йыл болмай. Шо саялы сувукълар болгъунча, урлукъ дагьни топуракъгъа тёшелип битсе, бир жумадан бир тегишден чыгъар ва бузлавлар болгъунча тамурланып беклешер.