Аврувну алдын алайыкъ
Район администрацияны жыйынлар оьтгерилеген уллу залында районну башчысы Магьмут Амиралиев тюкенлени, теплицаланы, оьзге тюрлю сатыв-алыв этеген къурумланы ёлбашчылары булан оьтгерилген ёлугъувунда бирдагъы керен коронавирус аврувну гьалы ва вакцина этдиривню гьакъында сёйледилер.
Шо ёлугъувда Къарабудагъгент ЦРБ-ни баш врачы Расул Гьиравов да оьзюню сёзюнде эсгерген кюйде, артдагъы вакътилерде яш ва жагьил адамлар да авруйгъанын ва жуманы ичинде бир-эки адам гечинегенин айтды. Олай да, дарманлар ва оьзге тюрлю препаратлар гьатта Москвадан заказ этилип гелегенин англатды.
Шо ёлугъувда Къарабудагъгент ва Губден юртланы башчылары Магьамматсолтан Гьасанов ва Осман Жалилов сёйледилер. Олар да генгешге чакъырылгъанланы вакцина этдирмеге ва оьзлени ишчилерине шо гьакъда англатыв иш юрютмеге чакъырды.
Ёлугъувну ахырында районну башчысы Магьмут Амиралиев эсгерген кюйде, аврув яйылса ва гючленсе, школалар ва оьзге охув ожакълар уьйден туралы охуйгъан болажакъ. Шолай болса, охувчуланы билимини даражасы осал ва тёбен болагъаны ачыкъ.
Оьзюню сёйлевюню ахырында М.Амиралиев тюкенлени, теплицаланы, сатыв-алыв юрютеген къурумланы ёлбашчыларына вакцина этдирив ишге жаваплы кюйде янашмагъа чакъыра туруп, оьзлени дос-къардашына ва ишчилерине савлугъун аямакъ учун вакцина этдирмеге чакъырды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
