Пайдалы экскурсия оьтгерилди

Культура-тюшюнюв маршрут Къарабудагъгент районну башчысы Магьмут Амиралиевни, ДР-ни билим берив ва илму министерлигини якълаву ва район администрацияны яшёрюмлерини ва социал сиясат бёлюгюню гьаракаты булан «Культура детям!» деген милли проектни яшавгъа чыгъара туруп оьтдю.

Санкт-Петербург шагьарда экскурсияда болгъан гюнлени ичинде яшлар Пачалыкъ Эрмитражда да болду. Белгили кюйде, Пачалыкъ Эрмитаж – Россияда, гьатта савлай дюньяда да инг де уллу, инг де агьамиятлы чебер ва культура-тарих музейлени бириси деп гьисаплана. Охувчулар онда оьзлер учун кёп пайдалы затланы гёрдю ва англады.

Олай да, экскурсияны барышында экскурсияны ортакъчылары – охувчулар Невадагъы ябушувну диорама музейине-заповедникге, «Россия – моя история» деген тарих паркгъа, Петр пачаны атындагъы Баш дав-денгиз музейге, «Петровская Акватория» деген музей-макетге, «Петергоф» деген Пачалыкъ музей-заповедникге ва башгъа тарих, архитектура ва культура биналагъа баргъан. «Петергоф» музей-заповедникни майданы 112,5 гектар экенге, ону 150-ге ювукъ фонтанлар безейгенге охувчулар бек тамашалыкъ этип къарагъан.

Охувчуланы шолай уллу ва пайдалы экскурсиягъа районну яшёрюмлерини ва социал сиясат бёлюгюню ёлбашчысы Гюлжанат Темирова, Къарабудагъгент 2 номерли орта школаны ёлбашчысы Гьалимат Гьарумова ва Къарабудагъгент район ЦРБ-ни баш медсестрасы Мадина Шагьманаева узатгъан.

Экскурсияны къурувчулары, охувчулар ва оланы ата-аналары районну башчысы Магьмут Амиралиевге, ону орунбасары Жалалутдин Жамалутдиновгъа бары да охувчуланы атындан шолай пайдалы, тюшюнюв экскурсияны оьтгермеге имканлыкълар болдургъаны саялы, гьакъ юрекден баракалла билдире.

Оьтгерилген экскурсия охувчуланы эсинде кёп замангъа къалажагъына олар гьакъ юрекден инана.