Кавказ учунгъу ябушув

Чараны ачгъан ва юрютген баш китапханачы Азинат Пашаева белгиленеген гюнню тарихи гьакъда охувчулагъа хабарлады.

Сонг сёз берилген муаллим Зумрут Пашаева Уллу Ватан давда инг де узакъ ва кёп тас этивлер болгъан ябушувланы бириси – Кавказ учунгъу ябушувну гьакъында маълуматлар гелтире туруп сёйледи:

-Кавказ ябушув Сталинград ва Курск ябушувлар булан бир заманны ичинде юрюлген. Кавказ учунгъу ябушувда Къызыл асгерни 334 минг солдатны жан берген, шо ябушув 442 гюн юрюлген…

Шо вакътилерде душмангъа къаршы Кавказда яшайгъан эргишилер булан бирче къатынгишилер де, яшлар да оьзлени къошумун этген. Олар окоплар къазгъан, чораплар сокъгъан, авлакъларда ашлыкъ оьс­дюрген ва жыйгъан, фронт учун продукталар гьазирлеген, — деп хабарлай ол.

Сонг сёйлеген район администрацияны маданият ва туризм бёлюгюню ёлбашчысы Найида Мурзаева муаллимни сёзюн узата туруп:

- Фашист елевчюлер Кавказ тавлардан оьтюп, Бакю наплагъа ес болма сюйген. Къызыл асгерни мурады – оланы шонда чыкъмагъа къоймай токътатмакъ болгъан. Бир-бир алимлер айтагъан кюйде, Кавказ учунгъу ябушувда фашист-немислер уьст гелген буса, Уллу Ватан давда биз Уьстюнлюкню къазанма болмажакъ эдик. Совет солдатлар, оланы ичинде кавказлылар да шо давда уллу къоччакълыкълар ва игитликлер гёрсетген. Кавказ ябушувларда уьст гелгенлигибизде аслу ерни душмангъа бизин халкъны бирче къаршылыкъ билдиргени, бир-бирин якълагъаны себеп , — дей.

Оьзлени сёйлевлеринде олар охувчуланы Ватанны патриотлары болма, элин сюйме ва якълама, ата-бабаларыбызны адатларын билме ва сакълама чакъырды. Чараны барышында ону ортакъчылары китап­хананы къуллукъчулары гьазирлеген «Битва за Кавказ» деген китап выставка булан таныш болду.