Дагъыстан адабиятны классиги

Шаирни эсделигине багъышлангъан чарада Къарабудагъгент 1,3 ва 5 номерли школаланы охувчулары оьзлени ортакъчылыгъын болдурдулар. Олай да, чарада къумукъ тил дарсланы муаллимлери, китапхананы, музейни, ЦТКНР-ни къуллукъчулары ортакъчылыкъ этди.

Ёлугъувну ача туруп, баш китап­ханачы Азинат Пашаева залдагъыланы Йырчы Къазакъны оьмюрбаяны булан таныш этди. Олай да, китапханачы жыйылгъанлагъа ону яратывчулугъу гьакъда да хабарлады.

Сёз берилген район администрацияны маданият ва туризм бёлюгюню ёлбашчысы Н.Мурзаева да шаирни яратывчулугъу гьакъдагъы лакъырны узатды.

- Йырчы Къазакъ язагъан шиъруларында ва йырларында ярлы халкъны эркинлигин, парахатлыгъын якълагъан, ол оьтесиз гючлю макътавгъа лайыкълы уланланы гьакъында язгъан. Ону яшавундагъы инг яхшы ва асил хасиятлы адамлар яратывчулугъунда да аслу ерни тугъанлар. Шаирни къоччакълыкъгъа, игитликге, парахатлыкъгъа багъышлангъан шиърулары къумукъ поэзияны символу болуп токътагъан.

Халкъ огъар Йырчы деген атны негьакъ бермеген. Шо ат булан ол бары да халкъланы арасында белгили де болгъан. Ону асарларын бугюнлерде де белгили йыравлар ва яратывчу коллективлер йырлай, — дей ол.

Сонг сёз берилген «Къарабудагъгент» деген А.Къаплановну аты къоюлгъан халкъ хору башында ёлбашчысы Аскендер Исрапилов да булан Йырчы Къазакъны «Чатакъ йырын» йырлады.

Китапхананы къуллукъчулары Й.Къазакъны гьакъында башгъа язывчуланы ва шаирлени сёзлерин ва шиъруларын эсге алды.

Чараны барышында Къарабудагъ­гент 1,3 ва 5 номерли школаланы охувчулары шаирни шиъруларын чебер кюйде гёнгюнден охуду. Шаирни тувгъан гюнюне багъышлангъан тюрлю чаралар жуманы ичинде дагъы да оьтгерилежек .