Бюджетни толувуну масъаласы
Гьаманда йимик, оьтген талатгюн, 12-нчи октябрде район администрацияны жыйынлар оьтгерилеген уллу залында районну администрациясыны аппаратыны гезикли генгеши оьтгерилди. Генгешни ишинде район администрацияны управлениелерини ва бёлюклерини ёлбашчылары, районну ичиндеги юртланы башчылары булан бирче налог ва суд пристав къуллукъланы ёлбашчылары ва жаваплы къуллукъчулары оьзлени ортакъчылыгъын болдурдулар.
Генгешни башында районну башчысы Магьмут Амиралиев алдагъы гюнлерде ДР-ни Башчысыны заманлыкъгъа борчлараны кютеген Сергей Меликовну ёлбашчылыгъы булан налогланы гьакъында республика комиссияны генгеши оьтгерилгенин айтды. Шо генгешде М.Амиралиев 3 йылны боюнда шагьаргъа яда районгъа гёрсетилген жыйылмагъа тарыкълы налогну оьлчевюн алышдырмай къоймакъны таклиф этгенин ва шо таклифни Сергей Меликов бютюнлей якълагъанын ачыкъ этди.
Генгешни барышында аслу докладчы гьисапда район администрацияны башчысыны орунбасары Сапиюлла Сайитов сёйледи. Ол оьзюню сёйлевюнде 2021-нчи йылны 9 айыны боюнда район администрацияны бюджетини толувуну гьакъында баянлыкълар берди.
С.Сайитовну сёзлерине гёре, умуми алгъанда районну бюджетини толуву – 92 процент. Шоллукъда, УСН, ЕСХН, акцизлер, патентлер ва пачалыкъ тёлевлер толу кюйде жыйылагъанын ол эсгерди.
Олай да, оьзюню сёйлевюнде С.Сайитов налог ва налог тюгюл гелимлени ва юрт администрацияларда жыйылгъан налогланы толуву гьакъда мекенли кюйде маълуматлар берди.
Оьзюню сёйлевюн тамамлай туруп, район администрацияны башчысыны орунбасары С. Сайитов юртларда рейд чараланы оьтгермеге, полицияны участковыйлары булангъы ишни гючлендирмеге ва налогланы оьлчевлерин мекенлешдирмеге чакъырды.
Генгешни барышнда районну гьакимбашы Магьмут Амиралиев, гьаманда йимик, оьзюню пикруларын айтды ва таклифлерин берди. Демек, юртланы башчыларына 1 айны болжалында налог тёлевлени ёрукълашдырмагъа, район администрацияны бёлюклерини къуллукъчуларына денгиз ягъадагъы идараланы инвентаризация этмеге тапшурду.
Олай да, генгешни ишинде оьзюню ортакъчылыгъын болдургъан УФССП-ни Къарабудагъгент район бёлюгюню ёлбашчысы Руслан Биймурзаев 9 айны узагъында суд приставланы бёлюгюню иши гьакъда баянлыкълар берди. Ону сёзлерине гёре, шо вакътини ичинде суд приставланы бёлюгю къурумлардан ва адамлардан, налог къуллугъундан ва судлардан гелген гьукмулагъа гёре, район бюджетине нечесе миллион манат тёлевлер йиберген.
Генгешни гьасилин чыгъара туруп, районну башчысы Магьмут Амиралиев бирдагъы керен район администрацияны жаваплы къуллукъчуларына ва юртланы башчыларына йылны ахыры болгъунча бары да налог тёлевлени толтурмагъа тапшурду.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
