Орус тилни устасы
Касбуланы арасында къайсы да тарыкълы ва герекли буса да, шоланы арасында абурлулары ва абургъа лайыкълылары да бар. Муаллимлик касбу шолай абурлу ва макътавгъа тийишли касбулардан санала. Оьзю муаллимлик касбугъа ес болмакъ учун школада охуйгъан заманындан берли ал сыдырада юрюмеге герекден башгъа да, яшлар булан къатнамагъа ва оланы къыйынын-дертин билмеге пагьмусу болмагъа тарыкъ.
Уллубийавул орта школада орус тилден ва адабиятдан 30 йылны узагъында муаллим болуп ишлейген Ягьияева Муъминат Аташевна шу биз оьрде эсгерген къылыкълары булангъы муаллим.
Муъминат Ягьияева 1969-нчу йылда Къарабудагъгент районну Уллубийавул юртунда ишчини агьлюсюнде тувгъан. Ата юртундагъы анадаш школасын яхшы къыйматлагъа тамамлагъан сонг, ол Дагъыстан пачалыкъ педагогика институтну филология факультетине охумагъа тюше ва 1991-нчи йыл ону уьстюнлю кюйде тамамлай.
Шоллукъда, педагогика институтну битдирген гюнден башлап, Муъминат Ягьияева Уллубийавул орта школада орус тил ва адабият муаллим болуп загьмат тёгегени бугюнлерде 30 йыл тамамланды.
Арадан оьтген шу йылланы вакътисинде М.Ягьияева оьзюню загьмат чалышывунда алдынлы педагогика технологияланы ва янгы методикаланы къоллап гелген. Орус тилден ва адабиятдан дарс береген муаллимлер оьзюню ишинде къоллайгъан илму-методика журналланы ва интернет торундагъы сайтланы да ол къоллагъан.
Ону иш ёлдашлары эсгереген кюйде, ол оьзюню ишин мекенли билеген ва ишине яратывчу янашагъан муаллим. Муъминат Ягьияева Т.А.Ладыженская ва В.Я.Коровина къургъан охув-методика китаплагъа гёре школада дарсларын юрюте.
Озокъда, Муъминат Ягьияева дарс берген охувчулар ОГЭ-лерден ва ЕГЭ-лерден яхшы баллар алмагъа бажара. Масала, 2017-2018-нчи йылны ахырында ЕГЭ берген 3 охувчу орус тилден 90 бал алмагъа бажаргъан эди. Олай да, ол дарс берген охувчулар район олимпиадаларда алдынлы ерлени къазанмагъа бажара.
Ягьияева Муъминат Аташевна Уллубийавул орта школагъа сынав (практика) алмакъ учун гелген вакътисинде бир айны узагъында магъа да дарс берген. Ону дарсына яшлар яхшы тынглай эдик, ол дарсны айтагъан кююне биз рази эдик. Айтагъаным, Муъминат Ягьияева яш ва жагьил заманындан берли оьзюню ишин сюеген ва шогъар берилген герти муаллим.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
