Бажарывлу ёлбашчы

Муаллимни байрам гюнюню алдында муаллим ва ёлбашчы Жамаева Рашияханум Магьамматаваловнаны гьакъында айтмакъны тюз гёремен. Ол Дёргели 1 номерли орта школада директор болуп ишлей.

Рашия Жамаева Къарабудагъгент районну Дёргели юртунда кёп яшлы агьлюде тувгъан ва тарбиялангъан. Школаны битдирген сонг, ол Дагъыстан пачалыкъ университетни орус ва дагъыстан тиллени бёлюгюне охумагъа тюшген. 1999-нчу йыл оьр охув ожакъны охуп битдирген сонг, ол оьз школасында муаллим болуп ишин башлай. 2008-нчи йыл Рашия Жамаева Дёргели 1 номерли орта школаны ёлбашчысы этилип белгилене. Пагьмулу муаллим пагьмулу ёлбашчы болуп ишин узата. Оьзюгер де, иш ёлдашларына да талаплы, ишине бек жаваплы Р.Жамаева тарыкъ болгъанда йымышакъ болуп да иш ёлдашларына тюзевлю янаша.

Ёлбашчы гьисапда Р.Жамаева ­оьзюню инг яхшы хасиятларын ва усталыгъын аян эте. Шогъар гёре де Дергели 1 номерли орта школада бек дос, бирикген ва жаваплы муаллимлер иш гёре, олар бары да масъалаланы тюзевлю чечме, охувчулагъа сан янлы билимлер ва тарбия бермеге бажара. Билим берив ишни уста кюйде къуруп, школада алдан берли адатлангъан къайдаланы юрютеген ёлбашчы муаллимлени янындан якълав ва англайгъанлыкъ таба. Р.Жамаева коллективдеги бары да масъалаланы чечме, муаллимлени олардан къоруп сакълама, олар ишине толу кюйде берилсин деп бар гьаракатын болдурма чалыша.

Ол иш ёлдашларыны, охувчуланы ва ата-аналаны арасында оьз ерин тапгъан, оланы абурун къазангъан. Билимли ва бажарывлу ёлбашчы охувчулагъа ва иш коллективине уллу гьюрмет булан янаша. Р.Жамаева охувчулагъа ва коллективге янгыз ёлбашчы болуп къалмай, ол ювукъ къурдаш да,рагьмулу ёлдаш да болуп ишин кюте. Тарыкъ болгъанда, оланы якълай, кёмегин болдура.

Рашияханум Жамаеваны етишип гелеген Муаллимни гюню булан къутлай туруп, огъар савлукъ, ишинде уллу уьстюнлюклер ёрайбыз.