Абур къазангъан

Ону сюйкюмлю келпети, асил къылыгъы, саламат сёзю охувчу яшланы дарсгъа бек муштарлы эте эди. Атий Далгьатова ишни бек бажарывлу кюйде юрюте, гёнгюллю болагъан кюйде. Охувчу яшланы ва выпускниклени ва коллективни арасында бек абуру бар. Ол адамны аты макътавдан таймай, школада ва халкъ арада да бек абуру-сыйы бар адам. Мен бек шат боламан Атий Сотавовнаны алдында тарбиялангъангъа. Балики, мени ишлеримни къурашмакълыгъына Атий Сотавовна да себеплидир. Атий Сотавовнаны алдында тарбияланган адам насиплидир. Атий Далгьатова 1966-нчы йыл Къарабудагъгент районну Къакъашура юртунда Сотав ва Женнетханым Абуловланы агьлюсюнде тувгъан

Атий Сотавовна 1983-нчю йыл Къакъашура орта школаны битдирип, шо йыл Избербаш педагогика училищеге тюше. 1987-нчи йыл училищены тамамлап, юртуна къайта ва Къакъашура орта школаны муаллими болуп иш башлай. 1989-нчу йыл ДГПУ-ну география факультетине охума тюше ва 1995-нчи йыл охувун битдире, оьр билимге ес бола.

Оьзю школада ишлей туруп, республиканы оьлчевюнде кёп тюрлю чараланы ­оьтгерген, тарихге байлавлу кёп тюрлю маълуматлар жыйгъан, тарихни сакълама кеп гьаракат этген муалим. Къакъашура юртну давда къалгъан ветеранларыны гьакъында ахтарыв ишлер юрютген, гьалиде шо ишни юрютюп тура. Тарихге, спортгъа ва Къакъашура юртдан чыкъгъан белгили адамланы гьакъында школада кёп тюрлю стендлер къургъан.

Атий Сотавовна 2020-нчы йыл «Почётный работник воспитания и просвещения Российской Федерации» деген сыйлы атгъа ес болгъан. Ол республика ва район олимпиадаларда ва конкурсларда 1-нчи ерлеге де ес болгъан. Атий Далгьатова школада ишлейгени 35 йылгъа айлангъан, шо йылланы ичинде ол кёп яшны тарбиялагъан. Бугюн олар да уллу ишлерде гьар бир тармакъларда иш гёрюп тура. Бугюнлерде ол халкъны разилигин алып ишин узата.

Шу муаллим байрамы булан ва 55-йыллыкъ юбилейи булан да ону гьакъ юрекден къутлайман.

Жамал Дорушев,

Къакъашура юрт