Тарихге гёз къарата

Байрам чарада шо гюн гелген къонакълар: Къарабудагъгент районну ветеранларыны советини председатели, ДР-ни физкультурасыны ат къазангъан къуллукъчусу Имамутдин Жалилов, ДР-ни билим беривюню отличниги, РФ-ни билим беривюню айтылгъан къуллукъчусу, Къарабудагъгент 3 номерли орта школаны муаллими Солтаназиз Гьайдаров, олай да школаны директору Магьамматмурат Канзитдинов, муаллимлер ва 9,10,11-нчи класларыны охувчу яшлары ортакъчылыгъын болдурду.

Чараны къурувчулары Дагъыстанны тарихинден дарс береген муаллим Райсанат Амаева ва география дарсны муаллими Айсарат Исрапилова чара оьтгерилеген класны байрамча плакатлар ва тамгазетлер булан безендирип онгаргъан эди. Чараны аслу мурады оьсюп гелеген яшланы патриот ругьда ва ватангъа бакъгъан сюювде тарбияламакъ эди.

Шо гюнгю чараны школаны 11-нчи класыны охувчу къызлары Румия Аминтазаева ва Нюрбийке Арсланбекова ачды ва юрютдю.

Олар жыйылгъанлар булан саламлашып, байрамны тарихини гьакъда хабарлады.

Шатлыкъда сёйлеген аслу док­ладчы 5 номерли орта школаны тарих дарсдан береген муаллими Къазимагьаммат Зайналов республикабызны 100 йыллыкъ тарихин гёзден гечирди, тав элини халкъларыны яшавуну гьакъында тынды­рыкълы кюйде хабарлады.

Демек, 1920-нчы йылны ноябр айыны 13-нде Темирхан-Шурада Дагъыстанны халкъларыны Алгъасавлу (Чрезвычайный) съездини барышында РСФСР-ни милли масъалалагъа къарайгъан халкъ комиссары Иосиф Сталин Дагъыстан АССР къурулгъанлыгъы гьакъда билдире. ВЦИК 1921-нчи йылны декабр айында Дагъыстанны халкъларыны 1 съездин оьтгере.

Шо съездде Дагъыстанны гьакимият къурумлары къурулмакълыгъы гьакъда хас документлер къабул этиле.

Чарада уллу класланы охувчу яшлары элине багъышлангъан шиъруланы чебер кюйде охудулар.

Гелген къонакълар Имамутдин Жалилов ва Солтаназиз Гьайдаров школаны муаллимлерин ва охувчу яшларын байрам булан къутлай туруп, элин сюймеге ва огъар абур этмекни ёрады.

Шо гюн район китапхананы къуллукъчулары Дагъыстанны 100 йыллыгъына багъышлангъан китап выставка ва 5-нчи класланы охувчуларыны арасында «Читаем о Дагестане» деген конкурс оьтгердилер.