Шатлы чаралар оьтгериле
Январ айны 20-нда ДАССР къурулгъанлы 100 йыл тамамланды. Шо агьвалатгъа багъышлангъан чараланы оьтгеривню планына гёре, “Кьарабудагъгент район” администрацияны социал-сиясат управлениесини сиптечилиги булан Гь.Абдуллаевни атындагъы Къарабудагъгент 1 номерли орта школада бек маъналы чара оьтгерилди. Чараны аслу мурады охувчуланы патриот ругьда тарбияламакъ, милли адатланы, дагъыстан халкъланы маданиятын уьйретмек ва билдирмек эди.
Байрамгъа багъышлангъан чарада ортакъчылыкъ этмек учун къонакълар да чакъырылгъан эди.
Олар: оьмюрге баргъанланы Советини председатели Абдулгьамит Мамагишиев, «Къарабудагъгент юрт» администрацияны башчысы Магьамматгьасан Гьасанов, Гьели юртдан «Юн булкъа» деген фольклор группаны ёлбашчысы Кюсюм Халилова, Агъай Къаплановну атындагъы эргишилени хоруну ёлбашчысы А. Исрапилов, Балхар юртдан гелген керамика ишлени устасы Магьият Давутова, Къарабудагъгент 3 номерли орта школаны директору Гюлжанат Зайнутдинова чарада актив кюйде ортакъчылыкъ этди.
Бары да жыйылгъанлар булан саламлашгъан сонг, эсгерилген школаны ёлбашчысы Рупия Парзаева оланы шатлы байрам – ДАССР-ни 100 йыллыгъы булан къутлады. Ол охувчуланы ана ватаныбызны сюймеге, ону тарихин билмеге чакъырды. Элибизни гёзеллиги, халкъланы бирлиги гьакъда хабарлады.
Байрам чараны ортакъчылары «Окна Дагестана» деген акциягъа гёре къошум билим береген «Эрудит» деген Центрны яшлары этген суратлагъа къарав булан башланды. Охувчулар школаны терезелерине Дагъыстанны 100 йыллыгъына багъышлангъан суратланы этген эди.
Сонг охувчулар муаллим Насигьат Алиева булан пряниклени уьстюне язывлар этди, уста Магьият Давутова булан керамика вазаны этеген кююне къарады ва ортакъчылыгъын болдурдулар.
Дагъыстанны гьакъында охувчулагъа къужурлу ва пайдалы маълуматлар булан Найида Мурзаева чыгъып сёйледи.
Олай да, чараны барышында школаны охувчулары Дагъыстангъа багъышлангъан шиъруланы охуду, йырлар йырлады.
Кюсюм Халилова ва Асгендер Исрапилов, жыйылгъанланы байрам булан къутлагъан сонг, ватангъа багъышлангъан йырланы йырладылар.
Къонакълар А.Мамагишиев ва Г.Зайнутдинова да жыйылгъанланы барысын да ДАССР-ни 100 йыллыгъы булан къутлады, элин сюймеге, тарихни билмеге чакъырды.
Чараны онгаргъан ва юрютген Найида Мурзаева бары да къонакълагъа, чараны оьтгеривде ортакъчылыкъ этген ва кёмеклешген муаллимлеге баракалла билдирип сёйледи.
Чараны барышында маданият тармакъны оьсювюне этген гёрмекли къошуму ва кёп йыллыкъ загьматы саялы Кюсюм Халиловагъа РФ-ни маданият министерлигини янындан Баракалла кагъыз тапшурулду.
ДАССР-ни 100 йыллыгъына багъышлангъан чаралар, клас сагьатлар, лакъырлашывлар районну башгъа школаларында, юрт китапханаларда яшлар бавларында да оьтгерилип тура ва йылны узагъында да оьтгерилежек...
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
