… Билмей къалажакъбыз

2021-нчи йыл тананы йылы деп айта. Тана – ожакъда берекетли гьайван. Ата-бабаларыбыз юрт-хозяйство авлакъ ишлерде гьар тюрлю къуллукъларда тананы гючюн, къудратын генг кюйде къоллап, яшав сюрюп гелген.

Тананы йылы берекетли, гёз алгъа салгъан къастлар яшавгъа чыгъагъан йыл болар деп умут этебиз. Планлар яшавгъа чыкъгъанны сюе бусакъ, биз оьзюбюз де белсенме, къаст этме тарыкъ­быз. Гьалиги девюрде бу айтывгъа онча агьамият берилмей буса да, «Ишлемеген – тишлемес» деген айтывну маънасы толу кюйде тайып битмеген.

Бавда бахчада

Къышны лап къагьрулу гюнлери – чилле де гелди. Къырда яхшы салкъынлыкъ бар буса да, бугюнлерде юртлу загьматчылагъа бавда-бахчада этме ишлер табула. Январ айны ахырында, февраль айны баш гюнлеринде теплицаларда ишлер массовый кюйде башланагъан вакъти.

Ачыкъ топуракъда овошлар оьсдюрме машгъул болма токъташгъанлагъа бир гюнню де артгъа салмай ишлени башлама, гьазирлик гёрме заман етишген.

Овошчулукъ тармакъда овошлардан мол тюшюмлер къайтарывда сан янлы урлукъланы агьамияты уллу. Гьали топуракъда доланагъанлагъа овошланы гьар тюрлю жураларын таклиф этеген фирмалар кёп. Урлукълар таклиф этеген далапчылар да ёкъ тюгюл. Тек бир зат ачыкъ: белгисиз ерден сизге тарыкълы урлукъланы алма бирдокъда ярамай. Сынавлу овошчулар овошланы оьзлеге тарыкълы жураларын къайсы фирмадан алма тарыкъны биле. Бу тармакъда сынаву ёкъ ёлдашлар оьзлеге тарыкълы овошланы шитилин базарлардан алып къоябыз дейгенлер ёлугъа.

Сан яны булангъы шитилни оьсдюрме рагьат иш тюгюл. Тек базарларда сатылагъан шитилни сан яны, журасы белгисиз бола. Шону эсде сакълап иш гёрсе, план тизсе, яхшы болур.