Арты-алды болма тарыкъ

Къарабудагъгент юртну жамиятыны жыйынын ача туруп, юртну башчысы М-С. Гьасанов:

- Бугюн сизин чакъырып жыйылмакъны себеби райцентрны орамларында саякъ айланагъан гьайванланы, олай да бизин чачывларыбызгъа тюшеген хоншу юртланы гьайванларыны, бизин къотанларыбызда, топуракъларыбызда туруп гьайван-мал сакълайгъан ёлдашланы гьайванларыны саякъ айланышыны алдын нечик алма болабыз? Бугюн шу жыйында бир пикирге гелип къарар чыгъарма та­рыкъбыз,-деди.

Юртда гьайванлар жыйылып туваргъа бармайгъаны, туварчы ёгъу нечесе йыллар бола. Гьайванланы есилери гьайванланы къабакъдан чыкъса, ол къайсылай, къайда бара, аварасы ёкъ. Къаравсуз къалгъан гьайванланы бир гесеги райцентрны орамларында, гюлбарларда гезейлер. Бир тайпалары хоншу Гьели, Къурбуки юртланы чачывларына тюше, бир бёлюгю буса ёл бой булан лап Манас базаргъа ерли чыгъагъан гезиклер аз болмагъан. Гьели юртну жамиятыны чачывларына бизин гьайванларыбыз тюшюп кёп татывсузлукълар салгъан гезиклер болгъан.

Районну башын тутгъан М.Амиралиев юртланы, айрокъда райцентрны гёзеллигин болдурувну гьайын эте, тувулунгъан имканлыкъланы къоллай. Амма орамларда саякъ къыдырагъан гьайванлар нас ташлайгъан контейнерлени авдарып, пата-пурхун чыгъара. Ёлларда саякъ гьайванлар себеп болуп, нече-нече авариялар болгъан?!

Жыйында юртну башчысы жамият Советни ёлбашчысы булан пикир алышдырып, юртну картасына къарап, юрт­ну ичинде бар гьайванланы туварчы тутамы яда гьайванлары барлар гезивге барамы – юртну гьар точкасына жыйып, отлавлукълагъа чыгъарма тарыкъ. Юртну гьар микрорайонунда яшайгъанлар гьайванларын гёрсетилген ерге ерли гьайдама тарыкъ.

Юртда гьайванланы жыйма 9 ер танглангъан.

Юртну ичинде саякъ айланагъан гьайванлагъа бирка салынажакъ. Бирка салынгъан гьайванланы есилерине биринчилей буварыв этилежек.

Жамиятны жыйынында ­ортакъчылыкъ этген Б.Агаев, И.Къаранаев ва оьзгелери гьайванланы къотанларда сакълама тарыкъ деген пикирни айтдылар. Савулагъан гьайванланы къотангъа йиберип эртен-ахшам ким сава деген масъала да арагъа чыкъды. Жыйында ортакъчылыкъ этгенлени бирлери саякъ гьайванланы тутуп сойма тарыкъ дегенлер де болду.

Адам кёп болгъан чакъы пикирлер де кёп бола. Тек юртдагъы саякъ гьайванланы алдын алывда низам болма ва яшавгъа чыгъарылма тарыкъ.

«Очаргъа салгъан гёнден чарыкъ чыкъмас» — деп айтыв бар. Тек шо гюн болгъан Къарабудагъгент юртну жамиятыны жыйыныны ортакъчылары бирликде райцентрны орамларында саякъ айланагъан гьайванлагъа биркалар салып, есилерине билдирме; бирдагъы керен ёлукъса, тутуп къотангъа етишдирме герек деген къараргъа гелдилер.

Чачывлагъа тюшюп зарал этген гьайванланы топуракъны есине тутма, сюйсе, сойма ихтияр бериле.

Юртну жамиятыны жыйынында жыйылгъанлар бир пикирге гелип, тарыкълы къарар къабул этгени яхшы. Бу къарарны яшавгъа чыгъармакъ учун юрт жыйынны депутатлары, вакиллер, жамият Советни уьюрлери, бары халкъ актив кюйде ортакъчылыкъ этме тарыкълар.

Кёп йылланы узагъында чайналып турагъан масъаланы чечме тезден заман болгъан.