Волейболдан ярышлар

Айтагъаным, округланы арасындагъы волейбол ярышланы бу гезиги ­оьтген 2020-нчы йылны декабр айыны 13-нден башлап юрюлме башлады. Шо ярышлагъа 16 команда къуршалып, олар да 4 группагъа бёлюнюп, башлапгъы ярышлар группаланы арасында юрюлдю. Гьар группада 1-2-нчи ерлени алгъан командалар оюнларын узатып юрюдюлер. Ярым финалгъа чыкъгъан «Баштатавул» команда «Алма бав» команда булан, «Бекенез» команда буса «Скачки» командасыны волейболчулары булан ёлугъуп, оьчешдилер. Оланы оюнундан сонг мекенли болгъанына гёре, финалгъа «Алма бав» «Бекенез» команда булан чыкъдылар. Шо ярышланы финал оюну 10-нчу январда «Олимп» спорткомплексинде кёп спортчу къаравчуланы ортакъчылыкъ этивю булан бек жанлы ва къужурлу юрюлдю. Шо гюнгю финал ярышлар 2:1 санав булан «Алма бав» команданы пайдасына тамамланды. Юртдагъы сайлав округланы волейбол командаларыны арасындагъы гезикли ярышлар дослукъну, къурдашлыкъны шартларында бек арив оьтгерилди. Ярышланы гьасиллерине гёре, «Алма бав» команда – 1-нчи, «Бекенез» – 2-нчи, «Баш татавул» команда буса 3-нчю ерлеге ес болдулар. Алдынлы ерлени къазангъан командалар ДЮСШ-ни ва спорткомитетни янындан кубоклар, медаллар, грамоталар ва акъча савгъатлар булан савгъатландылар.