Районну оьсювюне къаралгъан

Шо ёлугъувда ДР-ни топуракъ ва мюлк аралыкълагъа къарайгъан министри Завур Эминов, ону орунбасары Гьабип Жанаев, Къарабудагъгент районну гьакимбашы Магьмут Амиралиев ва оьзге жаваплы къуллукъчулар оьз­лени ортакъчылыгъын болдургъан.

Ёлугъувну башында республиканы еслигинден муниципалитетни еслигине топуракъ гесек бермекни гьакъында айтылгъан. Демек, шо топуракъны ичинден енгилликлери бар (льгота) ватандашлагъа топуракъ гесеклер бермеге гёз алгъа тутула.

Олай да, районну топуракъларындан оьтеген гьайван-мал юрюйген гёчювюл топуракъны ( скотопрогон) башгъа ерге гёчюрмекни ва шо ер учун оьзге топуракъ гесекни бермек масъала гьакъда да сёйленген.

Ёлугъувну барышында оьз­ге масъалалар булан бирче Къурбуки юртдагъы участка больницаны эсги бинасын район администрацияны еслигине бермекни гьакъында лакъыр юрюлген. Демек, шо бинада яшлар бавун къурмагъа гёз алгъа тутула.

Сонг да, «Манаскентский» ГУП-ну акционер жамиятгъа айландырыв масъаласына къаралгъан.

Ёлугъувну гьасилин чы­гъа­ра туруп, гётерилген масъалаланы ёрукълу ва тюзевлю кюйде чечмек муратда дагъы да ювукъ араны ичинде ёлугъув оьтгермеге токъташдырылгъан.