Имамлар булан ёлугъув
21-нчи январда районну башчысы Магьмут Амиралиев район администрациясында юртланы башчылары ва имамлары булан генгеш оьтгерди. Генгешде коронавирусгъа къаршы этилеген вакцинаны ва саякъ гьайванланы масъалары гьакъда лакъыр юрюлдю. Шо ёлугъувда ОМВД-ни Къарабудагъгент райондагъы бёлюгюню ёлбашчысы Герей Гереев, Къарабудагъгент ЦРБ-ни баш врачы Расул Гьиравов, ДР-ни Муфтиятыны райондагъы вакили Каримулла Шигьмуратов ёлдашлар да ортакъчылыкъ этдилер.
Ёлугъувну башында районну башчысы М. Амиралиев коронавирусгъа къаршы вакцинаны оьзю гёнгюллю кюйде этгенин ва оьзгелени де шону этдирмеге чакъыргъан сонг, саякъ гьайванланы масъаласыны гьакъында юртланы имамларына бир пикругъа гелмекни чакъырды.
Къарабудагъгент ЦРБ-ни баш врачы Р. Гьиравов вакцинаны гьакъында тындырыкълы кюйде айтды ва адамланы шону этдирмеге чакъырды. Айрокъда, пачалыкъдан тышгъа чыгъагъанлар шону этдирмесе, олагъа къыйын болажагъын ачыкъ этди. Олай да, ону сёзлерине гёре, бугюнгю гьал районда ёрукълу буса да, шону сакъламакъ учун дагъы да чаралар гёрмеге таклиф эди. Демек, вакцинаны этмеге чакъырды.
Район администрацияны УСХ-ны ёлбашчысы Ш. Мустапаев буссагьат районну ичиндеги юрт хозяйство мал болдурувчуланы гьаракаты гьакъда эсгерген сонг, оланы гелимине ва тюшюмюне саякъ гьайванлар кёп зарал этегенин айтды. Шо масъаланы чечмеге ол да чакъырды.
ДР-ни Муфтиятыны райондагъы вакили К. Шигьмуратов вакцинаны гьакында докторланы таклифин якълайгъанны эсгере туруп, саякъ гьайванланы масъаласына имамлар халкъ булан ярашып бир гьукму чыгъармагъа тарыкълыгъын аян этди.
Генгешде сёйлеген ОМВД-ни Къарабудагъгент райондагъы бёлюгюню ёлбашчысы Г. Гереев полицияны къуллукъчулары юртланы башчыларына ва имамларына саякъ гьйванланы масъаласын ёрукълу чечивде бары да кёмегин болдуражагъын ташдырды.
Генгешни гьасилин чыгъаргъан районну гьакимбашы М.Амиралиев бирдагъы керен имамлагъа ва юртланы башчыларына гётерилген масъалаланы тюзевлю чечивде жамиятны арасында англатыв иш юрютмекни ва бир пикругъа гелмекни таклиф этди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.