Меню
16+

Сетевое издание «Будни района»

04.09.2020 09:11 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Мактапгъа абат алынды

Автор: Нюрсагьадат Изамутдинова

Адатлангъан кюйде, гьар йыл сентябр айны 1-нде Россияда Билимлени гюню оьтгериле. Шо гюн яшлар бавланы гиччипавлары, мактапланы охувчулары, орта хас ва оьр охув ожакъланы студентлери билимлени дюньясына абатын ала ва оьзлени бажарывлулугъун артдыра.

Савлай дюньяда ва бизин элибизде яйылгъан янгы коронавирус аврув себепли болуп, янгы 2020-2021-нчи охув йылны башланывуна багъышлангъан чаралар районубузну ичиндеги мактапларда Роспотребнадзорну таклифлерине гёре оьтгерилди.

Демек, байрам чараларда оьтгерилеген линейкалар бу йыл генг кюйде болмады, охувчуланы ата-аналары ва дос-къардашы байрамларда ортакъчылыкъ этмедилер. Олай да, район администрацияны жаваплы къуллукъчулары гьар мактапгъа барып, профилактика чараланы барышына тергевюн болдурду.

Демек, школагъа гиреген гьар охувчуну ва муаллимни иссилигин оьлчеген сонг, къолларына антисептик себилди, бетинде маскалары бар экенлиги тергелди.

Районну билим берив управлениесини ёлбашчысы Тажли Хизриеваны маълуматларына гёре, 2020-нчы йылда районну мактапларына 1763 охувчу яш биринчилей абат алгъан. Бугюн-буссагьат районубузну ичиндеги бары да мактапларда 14 минг 200 охувчу билим ала. Оланы 6943-сю 1-4-нчю класларда охуй. Олагъа гьар гюн исси аш берилежек.

Къарабудагъгент районну башчысы Магьмут Амиралиев бары да охувчуланы ва муаллимлени янгы охув йыл ва Билимлени гюню булан къутлай туруп, муаллимлеге ва охувчуланы ата-аналарына Роспотребнадзорну талапларын яшавгъа чыгъармакъны таклиф этди, гьар тюрлю аврувдан сакъ турмагъа чакъырды.

Къарабудагъгент

гимназияда

Абдуллабек САМАДОВ

Оьтген охув йылны бизин охувчуларыбыз дюньягъа пелекет салып яйылгъан коронавирус аврувну яманындан кёп янын уьйлеринде туруп, арек къайдада тамамлады деп айтмагъа ярай. Муна, 2020-2021-нчи охув йылны заманы да етишди. Эсгерилген коронавирус аврув бизде бираз сейирлешсе де, бютюнлей тайып битмегенин гёз алгъа тутуп, охув йыл башланагъан гюн, 1-нчи сентябрде, школалагъа алда йимик бары да охувчулар жыйылмады. Айтагъаным, шо гюн школагъа башлап гелеген гиччипавлар, олай да 10-11-нчи класланы охувчулары гелген эдилер. Оланы къаршылай туруп, Къарабудагъгент школа-гимназияны алдында адатлы кюйде, шатлы болмаса да, ёлугъув-къаршылав оьтгерилди. Шо ёлугъувда районда билим беривге къарайгъан управлениени ёлбашчысы Тажли Хизриева, юрт администрацияны башчысы Магьамматсолтан Гьасанов, МФЦ-ни ёлбашчысы Жамал Гьабитов, башлапгъы класланы муаллимлери, ишде сынав топлагъан муаллимлер ортакъчылыкъ этдилер.

Ёлугъувда охувчуланы ва оланы муаллимлерин янгы охув йыл булан къутлай туруп, Къарабудагъгент гимназияны директору Адил Салаватов чыгъып сёйледи. Ол оьзюню сёйлевюнде бары да муаллимлеге къатты савлукъ, яш наслугъа билим-тарбия беривде уьстюнлюклер ёрады. Сонг чыгъып сёйлеген Тажли Хизриева, Магьамматсолтан Гьасанов, Жамал Гьабитов ва оьзге ёлдашлар школагъа башлапгъы абатларын алгъан яшлагъа, оланы къанат тюбюне алып билимлени дюньясына гийирежек муаллимлеге савлукъ булан парахатлыкъда уьлгюлю загьмат тёкмекни ёрады.

Гиччипавланы бир группасы муаллимлерине ва гимназиягъа багъышлап шиърулар охудулар. Сонг гиччипавлар муаллимлери де булан класларына гирип, гьариси олтурагъан ерлери ва биринчи муаллимлери булан ювукъдан таныш болдулар.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4