Меню
16+

Сетевое издание "Району яшаву"  «Будни района»

04.09.2020 09:05 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Иш сапар булан

Автор: Багьавутдин Самадов

Белгили кюйде, РФ-ни Президенти Владимир Путинни таклифине гёре, уьлкебизде «Билим берив», «Савлукъ сакълав», «Демография», «Маданият» ва оьзге милли проектлер къабул этилген ва шолагъа гёре РФ-ни бары да регионларында уллу ишлер юрюлюп тура.

Олай да, ДР-ни Башчысы Владимир Васильевни гьайлы янашыву булан республикабызда «Мой Дагестан» деген баш булан ёлланы, сувланы ва юртланы онгармакъ учун проектлер де къабул этилген.

Оьрде эсгерилген федерал ва регион программалар ва проектлер бизин районубузда да генг оьлчевлерде юрюле. Шогъар биз, районлулар, барыбыз да шагьатбыз ва сююнебиз.

Оьтген сонгугюн, 29-нчу августда, ДР-ни Гьукуматыны ёлбашчысы Артём Здунов бизин районда иш сапар булан болду.

Ону шо сапарында ДР-ни савлукъ сакълавну министри Жамалутдин Гьажиибрагьимов, ДР-ни Халкъ Жыйыныны депутаты Висимпаша Ханалиев, ДР-ни къурулуш ва ЖКХ министрини биринчи орунбасары Мурат Алиев узатдылар. Эсгерилген къонакъланы районну башчысы Магьмут Амиралиев, ону орунбасарлары, район Жыйыныны ёлбашчысы Бекболат Сахаватов къаршыладылар.

Инг башлап олар Къарабудагъгент ЦРБ-де болдулар. Гелгенлер район больницаны баш врачы Расул Гьиравов булан бирче больницаны дарманлар бар складына гирдилер. Олар коронавирус аврувну алдын алмакъ учун топлангъан дарманланы барлыгъын билген сонг, ЦРБ-ни баш врачы Р.Гьиравов булан лакъырлашды. Ол эсгерген кюйде, буссагьат район больницада 7 ИВЛ аппарат бар. Шо апаратларда тестлер оьтгериле.

ЦРБ-ни баш врачыны сёзлерине гёре, дарманлар ва оьзге тарыкъ-герек алатлар гележек 3 айгъа таманлыкъ этежек. Шо ерде ДР-ни Гьукуматыны ёлбашчысы А.Здунов дарман, оьзге алатлар запас болмагъа тарыкълыгъын айтды.

Районну башчысы М.Амиралиев ва Къарабудагъгент ЦРБ-ни баш врачы Р.Гьиравов районда янгы яшланы поликлиникасын къурмакъны тиледилер. А.Здунов муниципалитетни ёлбашчыларына бина къурулагъан ерни токъташдырмакъны тапшургъан сонг, Къарабудагъгент уллу юртланы бириси экенлигин айтды ва оланы таклифин якълады.

Сонг гьюрметли къонакълар ва районну ёлбашчылары Дёргели юртда болдулар. Олар инг башлап Дёргелиде къурулагъан янгы участка больницагъа бардылар.

Дёргели юртну больницасы бузукъ гьалда экенлиги хыйлы йыллар болагъангъа гёре, юртда эки къабатлы янгы участка больница къурулгъан. Буссагьат больницагъа 49 миллион 700 минг манатны къадарында медицина къураллар алмагъа гёз алгъа тутула.

Демек, 2020-нчы йылгъа къабул этилген республика бюджетге шо гьакъда алмашынывлар этилмеге гереклигин ДР-ни Гьукуматыны ёлбашчысы А.Здунов ачыкъ этди.

Шо гюн эсгерилген ёлдашлар, «Демография» деген милли проект­ге гёре, Дёргели юртда 200 гиччипавгъа къурулагъан яшлар бавунда да болдулар. Топуракъ гесек гёрсителген ерде буссагьат яшлар бавуну бинасы къурулуп тура. Бугюнге шо ишлени 30 проценти тамамлангъан.

Къурувчу бирлешивюню вакилини сёзлерине гёре, буссагьат яшлар бавуну къурулувуна 38 адам ва 2 хас техника къуршалгъан. А.Здунов къурувчуланы санавун артдырмакъны ва бинаны заманында битдирмекни талап этди.

ДР-ни Гьукуматыны ёлбашчысы А.Здунов яшлар бавуна тарыкъ­-герек алатланы ва къуралланы, гьайында къалып, оьз заманында алмакъны таклиф этди.

Районну башчысы М.Ами­ралиевни сёзлерине гёре, къурулагъан янгы яшлар бавуну айланасында гележекде адамлар яшайгъан янгы микрорайон къурулажакъ. Шо микрорайонну газ, ярыкъ, сув булан таъмин этмек учун ва янгы ёллар къурмакъ учун хас программа къабул этилген ва шогъар гёре иш юрюле.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2