Меню
16+

Сетевое издание «Будни района»

25.09.2020 10:03 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Муаллим ва насигьатчы

Автор: Нюрсагьадат Изамутдинова

Гьар адам яшавунда оьзюню юреги сюеген касбуну айыра. Биревлер танглагъан касбусуна амин болуп, оьзю ондан башгъасында ишлеп болмажагъын англап, гьакъ юрекден ишине берилип чалыша.

Бугюн мен оьзюню гьакъында язма сюеген бизин районну Дёргели юртундагъы 1 номерли орта школада ишлейген муаллим Ягьияева Разияханым Шугьайыповна– шолай муаллимлени бириси. Ол оьзюню яшавуну 40 йылын юртлу яшлагъа билим беривге багъышлагъан. Р.Ягьияева 1980-нчи йыл Буйнакск шагьардагъы педагогика училищени охуп битдирген сонг, Дёргели школада муаллим болуп ишлеме башлагъан.

Разияханым Шугьайыповна дарс берив методиканы оьр даражада юрюте, дарсны гьар бёлюгюн мекенли ойлашып, алдагъы бёлюгюне анализ этип, шогъар гёре артындагъын къуруп гьазирлей. Ол дарсларында охувчулагъа билим беривню рагьат ва пайдалы къайдаларын къоллай. Шо саялы да яшлар ону дарсларын ва оьзюн кёп сюе. Р.Ягьияева дарсларында педагогикада гьалиги замангъа гёре къурулгъан янгы къайдаланы толу кюйде къуршай, гьар дарсын тюрлю ва къужурлу этмекни уьстюнде чалыша. Р.Ягьияева жагьил муаллимлеге методика якъдан кёмеклеше, пайдалы насигьатлар бере.

Ишинде етишген уьстюнлюклери саялы Разияханым Ягьияевагъа 2010-нчу йылда «Почётный работник общего образования РФ» деген оьр ат берилген. Олай да, яшлагъа билим беривде гёрсетген къайратлы загьматы саялы, ол кёп санавдагъы гьюрметлев грамоталар ва дипломлар булан савгъатлангъан.

Разияханым Шугьайыповна сав­лай коллективни, охувчуланы, ата-аналаны ва юрт­луланы арасында абур къазангъан.

Ол дарсларын оьр даражада юрютюп, охувчуларына сан янлы билимлер ва тарбия берегенинден къайры да, юртну, школаны ичинде юрюлеген бары да жамият ишлерде, актив кюйде ортакъчылыкъ эте. Школаны ичинде, тышында этилмеге герекли ишлени де ол гьар даим гьайында тура. Кимге айтып, къайда барып буса да, школада этилмеге герекли ишлери этилинмесе, Разияханым Ягьияева рагьатлыгъын табып болагъан адам тюгюл.

Разияханым Шугьайыповна уьягь­люсю Абусайит булан уьч яшны оьсдюрген, олагъа яшавунда оьз ерин тапмагъа кёмеклешген.

Разияханым Ягьияева Макка-Мадинагъа барып Аллагьны алдындагъы гьакъ борчун кютюп, Гьаж къылып гелген. Дёргели 1 номерли школаны муаллим ва охувчу коллективи юртлулары Разияханым Шугьайыповнаны Муаллимни гюню булан къутлай, огъар савлукъ, агьлюсюне парахатлыкъ, ишинде буса уьстюнлюклер ёрай.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3