Меню
16+

Сетевое издание «Будни района»

25.09.2020 11:34 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Гёзел бажив

Автор: Багьавутдин Самадов

Белгили кюйде, 27-нчи сентябрде уьлкебизде яшлар бавларында гиччипавлагъа къарайгъан, олагъа тарбия береген тарбиялавчуланы гюню оьтгериле. Демек, шо гюн бары да тарбиялавчуланы атына лайыкълы ва баракалла сёзлер айтыла.

Оьзге юртларда ва яшлар бавларында йимик, Уллубийавулдагъы 12 номерли «Фиалка» деген яшлар бавунда да алдынлы ва пагьмулу тарбиялавчулар загьмат тёге. Халилова Зарема Вагьитовна бажарывлу, билимли ва пагьмулу тарбиялавчуланы сыдрасына гире деп ташдырып айтмагъа болабыз.

Зарема Халилова 1982-нчи йылда Уллубийавулда тувгъан. Ол ата юртундагъы мактапны битдирген сонг, ДГСХА-да ва РГПУ-да охуп, оьр билимлеге ес болгъан.

Ону анасы Умуханым яшлар бавунда тарбиялавчуну кёмекчисини къуллугъунда ишлейгенден берли, Зарема да гиччипавлар булан оьзюню загьмат `ёлун байламагъа токъташгъан деп айтмагъа ярай.

Айтагъаным, ол 2008-нчи йылда тарбиялавчуну кёмекчиси болуп ишге чыгъа, амма ол педагогика яндан оьр билимге ес болгъан сонг, 2013-нчю йылда тарбиялачу болуп иш башлай.

Арадан оьтген 7 йылны ичинде Зарема Халилова уллубийавуллу кёп санавдагъы гиччипавлагъа тарбия берген, оланы сёйлемеге, гьар тюрлю къуллукъланы кютмеге уьйретген.

З. Халилова яшлар бавуну ичинде оьтгерилеген бары да байрам чараларда гьаракатчы кюйде ортакъчылыкъ эте, ону гиччипавлары оьзюню ва ата-аналаны оьзлени пагьмусу булан сююндюре.

«Зарема Халилова «2019-нчу йылда оьт­герилген ДР-ни лап да яхшы яшлар баву» деген конкурсунда ортакъчылыкъ этген ва 2-нчи ерни къазанмагъа бажаргъан. Шо ону гьаракатын ва бажарывлулугъун исбатлай», — дей, ону гьакъында хабарлай туруп, 12 номерли «Фиалка» яшлар бавуну ёлбашчысы Гюлназира Магьамматова.

Зарема Халилова оьзюню ишинде яшланы гёнгюн алмагъа, олар булан исси сёйлемеге, ата-аналар булан ёл тапмагъа бажара. Оьтгерилеген чараларда Зарема лап да баш ва авур рольну юрюте деп айтмагъа ярай.

З. Халилова уьягьлюсю булан 4 яшны оьсдюре ва тарбиялай.

Гиччипавлар оьзлени тарбиялавчусуна «Гёзел бажив Зарема» деп айтагъаны да негьакъ тюгюл.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

69