Депутатлыкъ касбу йимик

Арсланали Абакарович муаллим агьлюде тувгъан ва тарбиялангъан. Ону атасы узакъ йылланы ичинде башлапгъы класларда муаллим касбуну юрютген, сонг да НВП-ни военный ёлбашчысы болгъан. Арс­ланали Валиев гиччиден берли атасыны ёлун тутуп, муаллим болма сюйген. Школаны охуп битгенде бир де ойлашмайлы, педагогика училишеге охума тюше. Узакъ ёлну оьтюп, А.Абакарович башлапгъы класланы муаллиминден оьз школасыны директоруна ерли гётериле. Муаллим болуп ишлей туруп, ДГПИ-ни тарих факультетин заочно кюйде тамамлай. Демек, Арсланали Валиев – юртну ичинде тарих дарсдан оьр билимге ес болгъан биринчи адам. Оьр охув ожакъны уьстюнлю кюйде тамамлагъан Арсланалини НВП-ни ёлбашчысы ва дав-патриот ишде директорну орунбасары этип белгилей. Ону гьакъ юрекден ишге берилгенлигин эс этген ёлбашчылар школагъа янгы директор болмагъа кандидатура тарыкъ болгъанда, Арсланали Абакаровични бир гёнгюлден директор этип белгилейлер. Арадан бир йыл оьтюп, 2001-нчи йылда ол Паравул 2 номерли орта школагъа директор этилип гёчюрюле. Эсгерилген школада директор болуп чалышагъаны да 20 йылгъа ювукъ бола. Ону уланлары да атасыны ёлу булан юрюй. Уланы Малик – география факультетни, Сайит – тарих факультетни, гелини Асият – математика факультетни битдирген. Мадинат – башлапгъы класланы муаллими. Гертилей де, гиччирек агьлю педсовет оьтгерип болардай, А.Абакаровични агьлюсюню уьюрлери – бары да муаллимлер, Арсланали Валиев публикагъа ишлейген сиясатчы тюгюл, оьзюню гьакъында къычырып да айланмай, бош сёзлер булан да адамланы инандырмай. Ону берген сёзюнде табулагъанлыгъы сайлавларда сайлавчуланы тавушларын алма кёмек эте. Ол оьзюню кёп гючюн, заманын, савлугъун, савлай юрегин школа учун берген. Школа ону экинчи уью болуп токътагъан. Ону ишлеген къыйыны негьакъ гетмеген, огъар «Дагъыстан билим беривюню отличниги», «Россия умуми билим беривюню гьюрметли къуллукъчусу» деген сыйлы атлар берилген. Мен ону Паравул юрт администрациягъа бирдагъы керен депутат болгъанлыгъы булан къутлайман, гележекде ва юртну жамият яшавунда, яратывчулукъ ишинде уьстюнлюклер ёрайман.