Сессияда къаралажакъ
16-нчы сентябрде ДР-ни Халкъ Жыйыныны президиуму сентябр айда оьтгерилежек парламентни 49-нчу гезикли сессиясыны гюнлюк масъалаларына къарагъан. Генгешни республика парламентни ёлбашчысы Хизри Шихсайитов ачгъан ва юрютген.
Аслу масъаланы арагъа салып ойлашгъынча, ДР-ни Халкъ Жыйыныны спикери Х.Шихсайитов АГИП-ни пачалыкъ савгъатлар ва кадрлар Управлениени ёлбашчысы А.Исрапиловгъа ДР-ни Халкъ Жыйыныны гьюрметлев грамотасын ва эсделик сагьатын тапшургъан.
ДР-ни Халкъ Жыйыныны гезикли 49-нчу сессиясы сентябр айны 24-нде 13 сагьатда оьтгерилежек. Шону оьтгеривде санитар-эпидемиология талаплар ва шартлар яшавгъа чыгъарылажакъ. Сессияны ишинде 34 масъалагъа къарамагъа гёз алгъа тутула.
Арагъа салынып ойлашылагъан аслу масъалаланы бириси – «ДР-ни 2019-нчу йылгъа къабул этилген бюджетини толуву гьакъда» деген закон. Шо гьакъда парламентни бюджет, финанс ва налог комитетини председатели С.Исакъов доклад булан сёйлежек.
Олай да, сессияны барышында ТФОМС-ну бюджети, транспорт налогну, увакъ ва орта далапчылыкъны оьсювю, гьайванланы ва жан-жаныварны якълаву, ичкичилик ва наркотиклени къоллавгъа къаршы, пенсионерлени тёбен даражалы пенсияларыны гьакъындагъы законлагъа къаралажакъ.
Президиумну вакътисинде ДР-ни Халкъ Жыйыныны ёлбашчысы Хизри Шихсайитов Магьачкъала ва Каспийск шагьарланы санитар гьалы гьакъда оьзюню пикруларын ачыкъ этген. Демек, ол эсгерген кюйде, эки де шагьарда санитар гьал бек бузукъ. Ол гьакимиятлыкъ шо масъалагъа осал тергев берегенин англатгъан.
Олай да, ол бюджет акъча маялар тийишли даражада халкъгъа етишмеге тарыкълыгъын ташдыргъан.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
