Сайлавланы гьасиллери чыгъарылды
Адатлангъан кюйде, арбагюн район администрацияны жыйынлар оьтгерилеген уллу залында районну администрациясыны гезикли генгеши оьтгерилди. Генгешни ишинде районну башчысы булан бирче район администрацияны бёлюклерини ёлбашчылары ва районну ичиндеги юртланы башчылары оьзлени ортакъчылыгъын болдурдулар.
Генгешни ачгъан ва юрютген районну башчысы М.Амиралиев 11-13-нчю сентябрде районну ичиндеги юртларда оьтгерилген сайлавланы гьакъында маълуматлар бермеге ва шоланы гьасиллерини гьакъында сёйлемеге Къарабудагъгент район территориал сайлав комиссияны ёлбашчысы Магьамматсайит Алпанаевни чакъырды.
М.Алпанаев эсгерген кюйде, сайлавлар оьр къурумлу даражада ва ачыкъ кюйде оьтгерилген. Сайлавланы барышында Роспотребнадзорну талаплары ва таклифлери яшавгъа чыгъарылгъан. Демек, сайлав участка комиссияланы уьюрлери, кандидатланы вакиллери, сайлавчулар сайлавланы барышында маскалар ва оьзге алатлар къоллагъан.
ТИК-ни ёлбашчысыны сёзлерине гёре, 11-13-нчю сентябрде оьтгерилген сайлавларда кандидатланы арасында 179 мандат сайлангъан. Сайлангъан депутатланы арасында «Бирлешген Россия» партияны кандидатлары 63 процент алгъан. Олай да, «Адилли Россия» партияны вакиллери 7,26, «Партия Роста» — 3,9 ва КПРФ 0,55 процент тавуш алгъан. Оьзбашына сайлавларда ортакъчылыкъ этген кандидатлар мандатланы 25 процентин алгъан деп, М.Алпанаев маълуматлар берди.
ТИК-ни ёлбашчысы сайлавланы къурумлу ва низамлы оьтгермек учун чалышгъан полицияны къуллукъчуларына ва участка сайлав комиссияланы уьюрлерине баракалласын билдирди.
Генгешде оьзюню ойлары ва таклифлери булан районну башчысы М.Амиралиев сёйледи.
Инг башлап, ол Къарабудагъгент район ТИК-ни ёлбашчысы М.Алпанаевге ва районну ичиндеги бары да участка сайлав комиссияланы уьюрлерине, олай да полицияны къуллукъчуларына сайлавланы къурумлу даражада оьтгергени саялы оьзюню ва район администрацияны атындан разилигин билдирди. Сайлангъан депутатлагъа буса ата юртуна, оьз жамиятына ва районуна пайдалы ва умпагьатлы болмакъны ёрады.
Генгешни узата туруп, районну башчысы М.Амиралиев транспорт налогну жыйылывуну гьакъында да мекенли кюйде айтды. Демек, шо налогну 303 миллион манат къадарындан бугюнге 260,5 миллион манат къалгъанын эсгерди. Ачыкълашдырып айтсакъ, налогну къадары 40 миллион манатдан къолай кемиген.
Олай да, М.Амиралиев юртлуланы башчыларына ерли налогланы тийишли даражада жыймакъны эсгере туруп, аслу гьалда топуракъ ва мюлк налоглар юрт администрацияланы пайдасына къалагъанын айтды. Шо налоглардан юртланы ичиндеги яшавлукъ-коммунал шартлар яхшылашдырылагъаны ачыкъ.
М.Амиралиев оьзюню орунбасарларына федерал ва республика хас программаларда ва проектлерде ортакъчылыкъ этивню гьар даим тергевню тюбюнде сакъламакъны тапшурду.
Аслу гьалда сув булан таъмин этив, газланы ва ярыкъланы масъалалары, ёлланы ва орамланы онгарыв, охув ва маданият ожакъланы къурув ва оьзге социал масъалалагъа гьар даим юрт ва район администрацияланы башчылары жаваплы экенлигин ачыкъ этди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.