Къагьруман улангъа – 130 йыл

У.Буйнакскийни атындагъы мемориал музейни майданчасына Магьачкъала шагьардан, Къарабудагъгент, Оьтемиш юртлардан белгили жамият чалышывчулар, профессорлар, алимлер, олай да уллубийавуллулар, юрт орта школаны муаллимлери ва охувчулары жыйылгъан эди.

Чараны аввалында ону ортакъчылары У. Буйнак­скийни эсделигине гюллер салдылар.

Сонг музейни илму къуллукъчусу Зайнутдин Магьамматов Уллубий Буйнакскийни яшав ва инкъылап ёллары гьакъда маълуматлар берди. Олай да, У.Буйнакскийге багъышлап дагъыстанлы алимлер, язывчулар ва шаирлер язгъан асарланы гьакъында хабарлады. Оланы яратывчулугъунда ону келпетин суратлады.

Эсделикге гюллер салывда районну администрациясыны социал сиясат управлениесини ёлбашчысы Г.Темирова, Уллубийавул юртну башчысы А.Абдурагьманов ёлдашлар ортакъчылыгъын болдурдулар.

Гьюрметли къонакълар, алимлер – Гь.Адилов, С.Алиев ва Д.Алкъылычев – Уллубий Буйнакскийни ойларын, пикирлерин жыйылгъанлагъа бирдагъы керен малим этдилер. Ону ойлары халкъны юрегинде даим яшажагъын ташдырдылар.

Компартияны райондагъы бёлюгюню 1-нчи секретары Ф.Элмурзаева оьзюню сёзюнде У.Буйнакскийни мемориал музейи бары да халкъны къуршайгъан ер болмагъа гереклигин герти эте туруп, шону къуллукъчуларына разилигин билдирди.

РФ-ни ат къазангъан, ДР-ни халкъ артисти, Къумукъ театрны актеру Б.Осаев, Уллубийге багъышлангъан йырдан бир гесекни йырлап, халкъны гёнгюн хошлу этди.

Т.Къазиханов ва К.Ма­гьамматов юртлуларыны атындан гелген бары да къонакълагъа баракалласын билдирип сёйледилер. Оьтгерилген байрам чарада Роспотребнадзорну талаплары яшавгъа чыгъарылды деп айтмагъа ярай.