Иш сапар булан районубузда

И. Хайруллинни иш сапарында ДР-ни Гьукуматыны вакиллери, Къарабудагъгент районну башчысы Магь­мут Амиралиев ва оьзге жаваплы къуллукъчулар узатдылар.

ДР-ни Гьукуматыны ёлбашчысыны орунбасары И. Хайруллин ва ону узатагъанлар инг башлап Дёргели юртда болдулар. Демек, олар Дёргели юртну топуракъларында къурулагъан янгы яшлар бавуна къарадылар.

«Демография» деген милли проектни бир бёлюгюне гёре, Дёргели юртну янгы микрорайонунда 200 гиччипавгъа ери булангъы янгы яшлар бавуну бинасы къурулмагъа башлангъан.

Бугюн-буссагьат эсгерилген къурулушда 40-дан къолай къурувчу ва бир нече хас техника ишлей. Олар оьзлени ишинде Роспотребнадзорну профилактика якъдан талапларын ва гёрсетивлерин яшавгъа чыгъара.

И. Хайруллин яшлар бавуну бинасын болжаллар булан гёрсетил­ген вакътиде тамамламакъны тапшура туруп, районну жаваплы къурумларына оьзлени кёмегин болдурмакъны тапшурду.

Олай да, шо гюн­ И.Хай­руллин ва ону узатагъанлар Къарабу­дагъгент юртну «Заммай» микрорайонунда 240 гиччипавгъа ери булангъы къурулагъан янгы яшлар бавунда да болдулар.

Шо ерде олар яшлар бавуну къурулувуну барышына тергев этген сонг, къурувчуланы санавун артдырмагъа таклиф этдилер.

Къурув ишлени юрютеген подрядчикни маълуматларына гёре, бажарывлу ва билимли касбучулар етишмей. Къурув бирлешивню вакили бинаны къурулуву оьзюню болжалындан артда къалмай юрюлегенин эсгерди.

ДР-ни Гьукуматыны ёлбашчысыны орунбасары И. Хайруллин оьзюню сапарын тамамлай туруп, Къарабудагъгент районну ичинде къурулагъан социал биналар оьзлени болжалында юрюлегенин эсгерген сонг, районну ёлбашчылары шолай ишлеге тергевлю ва жаваплы янашагъанын аян этди.