Халкъны эсинде къалажакъ...

Чара Байсолтан Осаевни Уллубий Буйнакскийге багъышлангъан йыры булан ачылды. Ону юрютювчюлери А.Пашаева ва Д.Ильясова ёлугъувну ортакъчылары булан саламлашгъан сонг, У.Буйнакскийни яшав ва инкъылап ёллары гьакъда гезиклетип хабарлады, ону булан Дагъыстанны халкъы оьктем болагъанны айтды.

-У.Буйнакскийни яшаву бизин яш наслубузгъа гьаманда уьлгю болуп туражакъ… Ол ярлы халкъны насиби учун жан берген. Судда ол оьзюню бек къоччакъ кюйде тутгъан...

«Мен тавланы къакъаларында оьсгенмен ва тав сабанчыны гьалы бек къыйынлы экенин яхшы билгенмен. Гиччи заманымдан тутуп, оьзюмню яшавумну дагъыстан халкъыма багъышлагъанман. Сизин булангъы ябушувда гючлю болмакъ муратда, мен олар учун охугъанман…

Мен совет гьакимлигини ва партияны уьстюнлюгюне къатты кюйде инанаман ва шо уьстюнлюк учун оьлме гьазирмен. Сиз мени ва мени йимик минглер булангъыланы гюллелерсиз, тек бизин халкъгъа сингип битген ойну гюллелемеге болмассыз!»…-деген ол оьлюмюню алдында.

Сонг Къарабудагъгент гим­назияны охувчулары У.Буй­накскийге багъышлангъан дагъыстанлы шаирлени шиъруларын гёнгюнден охуду.

Сёз берилген ана тил дарс­ланы сынавлу муаллими Умусалимат Бутаева, юртлардагъы китапханаланы къуллукъларын кютеген бёлюкню ёлбашчысы Аминат Сотаева охувчулагъа У.Буйнакскийни гьакъында бек маъналы хабарлады. Ондан гьар даим уьлгю алма, яхшы охума ва тарбиялы болма чакъырды. Охувчулар оланы хабарына бек тергевлю тынгладылар.

Оланы сёйлевлеринден сонг, китапхананы къуллукъчусу Д.Ильясова дагъыстанлы язывчулар ва шаирлер У.Буйнакскийни гьакъында язгъан китапланы обзорун оьтгерди.