Меню
16+

Сетевое издание «Будни района»

11.09.2020 09:02 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

«Адамны къысматы халкъ булан байлавлу»

Автор: Багьавутдин Самадов

Къарабудагъгент район администрацияны жыйынлар оьтгерилеген уллу залыны сагьнасы ренкли тамгазетлер ва тезги суратлар булан безенген. Шо суратланы ортасында савлай районубузну халкъына белгили Ибадулла Абакарович Ибадуллаевни сураты аслу ерни тута. Демек, 10-нчу сентябрде Ибадулла Абакарович Ибадуллаевни 80 йыллыкъ юбилейге багъышлангъан шатлы чара район администрацияны уллу залында оьтгерилди.

Ибадулла Ибадуллаев 1940-нчы йылда Паравул юртда тувгъан. Ата юртундагъы 7 йыллыкъ школаны тамамлагъан. Сонг ол ватаныны алдындагъы асгер борчун да намуслу кюйде кютген. Ибадулла Ибадуллаев оьзюню загьмат ёлунда кёп тюрлю тармакъларда гьар тюрлю къуллукъларда уьлгюлю кюйде чалышгъан. Демек, ол муаллим болуп яшлагъа билим берген, ерли совхозну ёлбашчысы болуп, халкъны социал яшавун яхшылашдыргъан, райондагъы пенсионный фондну бёлюгюн къуруп, оьмюрдеги ва сакъат адамланы яшавуна да оьзюню къошумун болдургъан.

Оьтгерилген шатлы чараны ачгъан ва юрютген районну администрациясыны социал сиясат управлениесини ёлбашчысы Гюлжанат Темирова юбиляр Ибадулла Ибадуллаевни яшав ва загьмат ёллары гьакъда генг кюйде маълуматлар берди.

Сонг къутлав сёз булан сёйлеген районну башчысы Магьмут Амиралиев оьзюню сёйлевюнде булай деди:

-Гьюрметли Ибадулла Абакарович, бугюн биз сизин 80 йыллыкъ юбилейигизни къаршылай туруп, сизге ва дос-къардашыгъызгъа кёп яхшылыкълар ёрайбыз. Сизин пагьмулу ишигиз, рагьмулу сёзюгюз, гьакъыллы оюгъуз оьсюп гелеген наслугъа гьар даим уьлгю болуп туражакъ. Сизин йимик абурлу ва гьюрметли адамлардан биз гьар даим ругь алабыз.

Сонг М.Амиралиев И.Ибадул­лаевге «Къарабудагъгент районну гьюрметли ватандашы» деген гьюрметли атны тапшурду.

Оьтгерилген шатлыкъда бизин районубузну башлапгъы ёлбашчысы Бекмурза Бекмурзаев, Пенсионный фондну райондагъы бёлюгюню ёлбашчысы Абдуразакъ Айдиев, муаллим Умусалимат Бутаева, Паравул юртну башчысы Иманали Изиев, район Жыйыныны депутаты Гьасан Гьасанов, паравуллулар Хизри Ибашев ва Батыргиши Агъаев оьзюню 80 йыллыгъын къаршылайгъан Ибадулла Ибадуллаевни атына лайыкълы ва макътавлу сёзлер айта туруп, огъар дагъы да къатты савлукъ ва узакъ оьмюр ёрадылар. Ерли йырав Гилянханым Агьматова И.Ибадуллаевге оьзю­ню бир йырын багъышлады.

Дос-къардашыны атындан Ибадулланы къызы Зугьра ва ону лап да уллу торуну (внук) шатлы чараны оьтгергенлеге ва ортакъчылыкъ болдургъанлагъа баракалла билдирдилер.

Оьтгерилген шатлы чараны ахырында юбиляр Ибадулла Ибадуллаевге сёз берилди. Ол оьзюню сёзюнде бу чараны онгаргъан ва юрютген ёлдашлагъа разилигин билдирди. Олай да, И.Ибадуллаев Къарабудагъгент юртну башчысы М.Амиралиевге халкъны разилигин ва гёнгюн алып ишлейгенине баракалласын берди. Сонг да, И.Ибадуллаев оьзюню яшав ва загьмат ёлларында гьар даим де яхшы хасиятлы ва рагьмулу адамлар ёлукъгъанына Есибизге алгъышлар этди.

Шатлы чараны ахырында Ибадулла Ибадуллаевни дос-къардашы булан гелген къонакълар кёп санавда эсделикге суратлар чыгъардылар.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2