Спортчу яшлар булан ёлукъгъан

Биз оьзюню гьакъында сёз юрютеген Магьаммат Исмайылов 1986-нчы йылны июн айны 21-нде Сверд­ловск областны Нижний-Тагил шагьарында тувгъан. Ону атасы – аварлы, анасы буса бизин районну Гьели юртундан. Оьзюне 7 йыллар болагъанда, Магьаммат ата-анасы да булан Магьачкъалагъа гёчген ва шо йылларындокъ спортну тутушуп ябушув журасы булан машгъул болма башлагъан. Гьели юрт школада башлапгъы класларында охугъан. Шо йылларда ону биринчи тренери Абусайит Алиев болгъан. Бугюнлерде савлай дюньягъа танывлу кочабыбыз Магьаммат Исмайылов бизин Къарабудагъгент юртну жамиатыны, айрокъда, спортчу яшёрюмлерини чакъырывуна гёре бизин юртда къонакълыкъда болду. Кочабыбызны узата туруп, белгили спортчулар Бозигит Атаев, Али Исаев, Магьамматны гьалиги тренери ва уллу къардашы Рамазан Исмайылов ёлдашлар да ёлугъувда ортакъчы­лыкъ этдилер. Шатлы ёлугъувну районну спорткомитетини къуллукъчусу Исмайыл Атаев ачды ва юрютдю. Ол ­оьзюню гиришив сёзюн гелген къонакълагъа багъышлап сёйледи. Магьаммат Исмайыловну буса гетген июль айны ахырларында Александр Емельяненко булан тогъа тартып ябушуп уьстюнлюк алгъаны булан къутлады. Сонг чыгъып сёйлеген район Жыйыныны­ депутатларыны ёлбашчысы Бекболат Сахаватов, Къарабудагъгент юрт администрациясыны ёлбашчысы Магьамматсолтан Гьасанов, Магьаммат Исмайыловну Гьелидеги биринчи тренери Абусайит Алиев, спортчу ювукъларындан: Бозигит Атаев, Али Исаев ёлдашлар да оьзлени сёйлевлеринде Магьаммат Исмайыловну уьстюнлюклери булан оьзлер де оьктем болагъанын айтдылар. Сонг, спорткомитетни къуллукъчусу Исмайыл Атаев, кочабыбыз Магьаммат Исмайыловгъа юртлу ва районлу яшёрюмлени атындан эсделик савгъат тапшурду. Оьз гезигинде чыгъып сёйлеген белгили кочап Магьаммат Исмайылов оьзюн абурлап, чакъырып шулай ёлугъув оьтгерген Къарабудагъгент районлулагъа, аслу гьалда яшёрюмлеге оьзюню баракалласын билдирди. Ёлугъувну ахырында кочабыбыз районлу яшёрюмлени кёплери булан эсделик суратлар чыгъардылар. Ол спортчулагъа оьзюню «эсделик хатын» (автогрофун) савгъат этди.