Намуслу кюйде кютгенлер

Десантниклени къурч ишлери, оланы къоччакълыкълары гьакъында да буссагьатгъы вакътиде де кёп айтыла ва эсгериле. Айтмагъа сюегеним, шолай десант асгерлерде къуллукъ этип, командирлени баракалласына лайыкълы болгъан солдатларыбыз районда да 50-ден де кёп бар. Шоланы 21-си – къарабудагъгентлилер. Оланы кёплерини ватангъа къуллукъ этивюню вакътисинде ата-анасына командирлеринден гелеген баракалла кагъызланы биз район газетни бетлеринден берип, районлуларыбызгъа да оланы яхшы яндан танытгъанбыз. Шолай макътавгъа лайыкълы десантниклерибизни кёплери бугюнде де оьз халкъыны арасында намуслу кюйде загьмат тёгюп юрюйлер. Масала, шоланы арасындан Абакар Шагьманаев, Абдулгьанипа Гьанипаев, Акъай Алиев, Жамалутдин Гьажиев, Мугьутдин Агьматов, Абдулмуъмин Иманмурзаев, Наби Умаев, Тимур Халилов, Магьаммат Тавлуев, Насу Гьанипаев, Абдулгьамит Абдуллатипов, Назим Даниялов, афгъан давланы ортакъчыларындан – десантниклерибиз Адилхан Паталиев, Агьматхан Давутов ва шолай оьзгелери, оьзлени хас байрамын – Десантниклени гюнюн гьар йылны август айыны 2-нде, барысы да дегенлей, жыйылып арив къаршылайлар. Шо гюн олар, оьзлени армиядагъы йылларындагъы агьвалатланы айтып хабарлайлар, арив эсде къалгъан агьвалатланы гёз алгъа гелтирелер. Муна алдагъы гюнлерде юртлу десант асгерлени уьюрлери жыйылып оьзлени хас байрамын шатлы кюйде белгилегенлер. Шо агьвалатдан пайдаланып биз де районну бары да десантниклерин август айны 2-синде белгиленген Десант войскаланы 90 йыллыкъ юбилей байрамы булан, къутлайбыз. Къаркъараларыгъызгъа савлукъ булан, насипли узакъ оьмюр ёрайбыз!