Меню
16+

Сетевое издание «Будни района»

07.08.2020 09:38 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Къакъашура ДЮСШ-де…

Автор: Абдуллабек Самадов

Бизин районну юртларындагъы ДЮСШ-лердеги ишлер йылдан-йылгъа алгъа абат ала. Айтагъаным, ДЮСШ-лерде спорт булан машгъул болагъан яшёрюмлени санаву йылдан-йылгъа артып юрюй. Шо саялы болмагъа ярай, спорт школалардагъы спорт инвентарлар да янгыртыла, толумлаша, гьасили, спорт булан машгъул болма сюегенлер учун ДЮСШ-лерде бары да онгайлыкълар болдурулуп юрюй.

Бу макъалабызда биз Къакъашура ДЮСШ-ни ишлери гьакъда айтмагъа сюебиз. Эсгерилген ДЮСШ-ге ёлбашчы болуп спортдан яхшы англаву булангъы Шамил Хыясов тюшгенли, шо спорт идараны ишлери яхшы янгъа багъып абатланмагъа башлагъан. Айтагъаным, Шамил Хыясовну хас касбусу налоговик буса да, ол институтну битдирип, физкультурниклени гьазирлейген хас курсларында охуп чыкъгъан сонг, Шамил оьзюню загьмат ёлун спорт школада тутушуп ябушув секциясыны тренери болуп башлагъан. Ону спорт уьстюнлюклерин, къурумчулукъ гьаракатын гьис этген юртлулары ва районну спорткомитетини ёлбашчылары Шамил Хыясовну 2011-нчи йылдан башлап ДЮСШ-ге директор этип белгилейлер. Шо йыллардан башлап спорт школаны ишлери бютюнлей алышынгъан деп айтма ярай.

ДЮСШ-ни ёлбашчысы Шамил Хыясов бизге берген баянлыкълагъа гёре, буссагьатгъы вакътиде ДЮСШ-де спортну 7 тюрлю журасындан 13 секция иш гёре. Шо секциялагъа да 13 тренер къуршалып, яшланы тюрлю ябушувлагъа, спорт оюнлагъа уьйрете. Буссагьатгъы вакътиде ДЮСШ-деги шо секциялагъа 5 йылдан 18 йыллыкъ чагъындагъы 330 яшёрюмлер къуршалып спортну тюрлю журалары булан машгъул болуп юрюйлер. Шо саялы да ДЮСШ-де бары да имканлыкълар болдурулгъан деп айтмагъа ярай. Къакъашура юртда яшлагъа спорт булан машгъул болмакъ учун ДЮСШ-ни ихтиярында 2 спорт идара бар. Ондан къайры да ювугъубуздагъы Къакъамахи юртда да район администрацияны кёмеклиги булан къурулгъан бек арив спортзалыбыз бар.

Бизин ДЮСШ-ни яшларыны ихтиярында 4 теннис ойнайгъан стол, 90х60 метрлыкъ футбол ойнайгъан майданча, ябушув булан машгъул болагъан яшларыбызгъа залны тюбюне яймакъ учун хас халчалар. «Местные инициативы» деген программагъа гёре къурулгъан бары да онгайлыкълары булангъы мини футбол майданчабыз да бар. Сонг да, яшларыбыз спорт булан машгъул болагъан залларыбыз, спорт инвентарлар булан бютюнлей таъминлешген. Шо саялы да бизге ва бизин алдыбызда спорт булан машгъул болагъан яшларыбызгъа гележекде спорт уьстюнлюклеге етишмек учун бизден болагъан гьаракатны этмеге герекбиз-дей ДЮСШ-ни директору Шамил Хыясов. Биз де олагъа спорт ярышланы барысында да ал сыдраларда болмакъны ёрайбыз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4